Temor di Dios , ta principio di sabiduria,
Temor di Dios ta produci consenshi limpi,
Temor di Dios e prome pilar di integridad,
Temor di Dios ta hiba na un karakter firme,
Temor di Dios ta pone nos respeta Dios, respeta otro, y respeta nos mes,
Temor di Dios ta hiba na crecemento spiritual berdadero,
Temor di Dios ta libra nos di tentacion,
Temor di Dios ta corre cu orguyo,
Temor di Dios ta aumenta amor pa prohimo,
Temor di Dios semper lo dirigi nos riba e paso positivo,
Temor ta trece pas den nos curason,
Temor di Dios ta trece relacion intimo cu Dios,
Temor di Dios ta aumenta e presencia di Dios den nos bida,
Temor di Dios ta nifica cu Dios ta tur cos pa nos.
Temor di Dios, semper ta pone nos pensa prome cu nos papia, Ora nos tin temor di Dios, nos ta respeta y pidi despensa caminda nos por a faya, pasobra nos no ta wak kico hende por pensa di nos, pero sea atento pa no haci e Spirito Santo di Dios tristo, no ta importa si ta un asunto grandi of chikito, no ta importa na cas of riba caya, nos ta arepenti y pidi despensa.
Temor di Dios ta pone cu nos no kier faya cu Dios ni cu hende, corda riba e historia di Hose den e buki di Genesis, ora cu e cas di Portifar a aserca cu un pensamento indecente, bisando pa tene relacion sexual cune,( Genesis 39:11-12), Hose su contesta tabata, cu e no por faya cu su Dios ni tampoco, cu e homber cu a pone confiansa den dje. Hose a prefera di corre bay y mantene su temor di Dios y su integridad.
E temor di Dios ta un fuente di bida, pa evita e trampanan di morto.( Proverbionan 14:27).
E temor di Dios ta e principio di conocemento, bobonan ta despresia sabiduria y instruccion.( Proverbionan 1:7).
E temor di Senjor ta pa odia maldad,orguyo, arogansia,y mal caminda, y un boca perverso, mi ta odia.(Proverbionan 8:13).
Bendiciona ta e hende cu semper tin temor, ma esun cu haci su curason duro lo cay den calamidad,( Proverbionan 28:14),
Mi ta bisa boso. Mi amigunan no tene miedo di esnan cu ta mata e curpa, y despues di esey no por haci nada mas. Ma Mi lo mustra boso di ken boso mester teme. Teme esun cu despues cu E a mata tin autoridad pa tira den fierno, si Mi ta bisa boso teme E !.( Lucas 12:4-5).
Pasobra nos conoce Esun cu ta bisa : Ta di Mi vengansa ta,Ami lo paga bek,y atrobe: “ Senjor lo huzga Su pueblo. Ta un cos teribel pa cay den man di Dios bibo.( Hebreonan 10:30-31)
Y na hende E a bisa: mira e temor di Senjor, ta esey ta sabiduria y aparta for di maldad ta comprendemento.( Job 28:28).
Ta un tristesa grandi di mira con hende ta chercha Dios, y kere cu nan lo sali gana, y mas ainda ora hende no ta hanja necesario pa reonoce Dios den nan bida, nan no ta compronde locual tin para den Romanonan capitulo 1 versiculo vers 28-32,pasobra e palabra di Dios ta mustra nos den e versiculonan ey cu si hende tin algo contra bo , Dios por yuda bo, pero ora Dios mes ta contra bo ta ken por yuda bo?
Den Romanonan 2:5 e palabra di Dios ta mustra nos un biaha mas cu nos asunto cu Dios ta personal.
Asina anto, Cada un di nos lo duna cuenta di su mes na Dios. ( Romanonan 14:12).
Sinceramente, Pastor Marcel Balootje
