No worry cu hende por yamabo cobarde, chapo,of simplemente bisa bo ta kens, pero temor di Dios ta principio di sabiduria. Temor di Dios ta guia bo den e boluntad di Dios, y mientras bo ta permanece den temor di Dios, lo bo tin menos dificultad den bo bida.
Temor di Dios no ta nifica miedo di Dios, pero e ta nifica Respet pa Dios, su Palabra, Principio y Dios su mandamentonan.
Miedo di hende ta conduci na trampa, pero temor di Dios ta conduci na libertad, ora un hende tin temor di Dios e pas di Dios ta den su curason.
Mientras cu maldad, malicia y inmoralidad ta avansa tur dia riba e mundo aki, temor di Dios mester prevalese den nos curason, pasobra e enemigo no ta respeta, pasobra di tur manera e kier infiltra den nos bida, nos cas y nos famia.
Temor di Dios ta hiba nos na intimidad cu Dios pesey e palabra di Dios ta bisa:E comunion intimo di Señor ta cu esnan cu ta teme Dios,y e lo haci nan conoce Su aliansa.Mi wowonan ta continuamente riba Señor pasobra E lo saca mi pianan for di trampa ( Proverbionan 25:14-15).
E diabel ta pinta su maldad asina bunita, cu hopi hende a lubida cu adulterio ta un trampa, ta un traicion, ta un falta di respet pa Dios y pa hende, y asina hende no kier reconoce cu nan ta den pica y cu nan mester arepenti y aparta di esey.
E uso di droga ta un trampa destructivo y mortal y hopi ta kere cu Droga ta algo bon, tin hende ta recomenda hende pa husa cierto tipo di droga, pero ta proba cu e ta destrui bida di hende, y droga ta destrui matrimonio y famia, pasobra droga ta un trampa diabolico, y adiccion si e no wordo atende na tempo, y si den e recuperacion di e persona Dios no ta envolvi, e persona ey tin hopi chens di bolbe bek den e caminda di adiccion.
Temor pa hende ta pone un trampa, ma esun cu confia den Señor lo ta halsa.( Proverbionan 29:25).
Temor di Dios ta e principio di sabiduria,tur hende cu cumpli cu Su mandamentonan tin bon comprondemento. Su alabansa ta permanece pa semper. (Salmo 111:10).
Temor di Dios ta evita pica ( Exodo 20:20).
Temor di Dios ta motiva nos pa evangelisa, pa asina e palabra di Dios por yega na tur hende, y asina mescos cu Dios a saca nos for di scuridad pa Su lus, e mesun oportunidad wordo presenta na bida di otro hende, pasobra Dios no kier pa ningun hende bay perdi , pero pa tur por yega na conocemento di e berdad.
Sea sobrio, sea alerta. Boso adversario, e diabel ta cana ront manera un leon cu ta gruña , buscando ken e por devora.( 1Pedro 5:8).
Pesey somete boso mes na Dios. Resisti e diabel y e lo huy for di boso. Hala serca Dios y E lo hala serca boso.( Santiago 4:7-8).
Tentacion ta presenta den tur forma pa haci daño na bida di hende, no ta solamente den asuntonan sexual of inmoralidad, pero tambe den asunto financiero, comemento, bistimento , etc., pero nos mester laga sano huicio prevalece, pa asina pone Dios na prome lugar den nos bida, pasobra Dios ta e unico cu por defende nos contra trampanan di e enemigo.
E tempo cu nos ta bibando aden, ta tempo trabahoso, y e binida di Cristo Hesus ta serca.
Pesey awor mas cu nunca laga nos hala mas serca Dios.
Sinceramente, Pastor Marcel Balootje
