Ta para scirbi den Jeremias 29:11 : Pasobra Mi sa e plannan cu Mi tin pa boso, Senjor ta declara,plan pa pas, y no pa calamidad, pa duna boso un futuro y un speransa.
Si nos traduci esaki letterlijk, un manera crioyo bisa, un hoben cu stop di bay scol, cuminsa cana riba caya, usa droga, bebe etc, su futuro y su speransa ta scur.
Si un hende ta casa y e cuminsa maltrata su esposa, y comete adulterio y no ta cria su yuinan, su futuro matrimonial ta scur.
Si un hende muher den cas, constantemente ta pleita pa placa, constantemente tin envidia y jaloersheid tocante famia, kier tuma over e liderasgo di e homber den cas , anto e ora ey e futuro di e famia ey ta scur.
Si un gobierno den un pais kier domina e pais cu forsa militar, dictadura, y mas pio ahinda , idolatria y bruheria e futuro di e pais ta scur y caminda tin idolatria y bruheria, probresa ta crece inmensamente.
Tur e cosnan aki ta pone nos wowo habri y pa nos tene bon cuenta si nos ta den boluntad di Dios, si of no, pasobra ora nos no ta den boluntad di Dios, Dios ta bay contra di nos . ( 1 Samuel 2:25).
Mester tene masha cuidao ora nos ta cana den boluntad di hende of boluntad di amistad, of boluntad politico, pasobra nada di esey no ta aumenta nos crecemento spiritual, ni tampoco nos intimidad cu Senjor, pasobra esun cu kier agrada hende no por ta un sirbido di Senjor.( Galationan 1;10).
E enemigo ta gusta usa hende como yoyo, pa nan ganja nan mes, pa nan wowo ta sera, pa nan ta modelo di inmoralidad, perversidad, sensualidad y malisia y nan ta kere cu ta grandi nan ta den cosnan mundano. Mester tene cuenta cu amistad cu mundo ta keda nifica enemistad cu Dios. ( Santiago 4:4-6).
E boluntad di Dios pa nos bida ta wordo splica den diferente forma, pero tur ta den concordancia cu otro,
1 Thesalonisensenan 4:3-4 Pasobra esaki ta e boluntad di Dios, boso santificacion,esta pa boso abstene boso di inmoralidad sexual,pa cada un di boso sa con pa tene su mes curpa, den santificacion y onor, no cu pasion di deseonan carnal manera e paganonan cu no conoce Dios.
Ta dificil pa un hende ta den bolantad di Dios canando den inmoralidad buracheria, adiccion, bruheria ,violencia y cu arma, e cos ey ta leu for di boluntad di Dios pa nos bida.
1 Thesalonisensenan 5:16-18. Regosiha semper, Haci Oracion sin stop,sea agradecido den tur cos,pasobra esaki ta e boluntad di Dios pa boso den Cristo Hesus.
Pasobra esaki ta e boluntad di Mi Tata, cu tur cu mira e Yiu,y ta kere den dj’E tin bida eterno, y Ami mes lo lante den e ultimo dia.( Juan 6:40).
No ta tur hende cu bisa Mi, Senjor, Senjor , lo drenta e reino di cielo, ma esun cu haci e boluntad di Mi Tata cu ta den cielo.
Haci e boluntad di Dios, no por keda bisa den palabra so, pero e mester bira un forma di bida pa nos, pa constantemente nos busca Su presencia y Su boluntad.
Ora nos ta desobedece ley nos ta for di boluntad di Dios, ora cu un hende ta maneha auto burachi, of corre na un velocidad mas halto cu mester ta , of ta papia na telefon , mientras cu ta stuur, causando acidente.
Boluntad di Dios ta importante pa nos bida, den tur circumstancia.
Sinceramente, Pastor Marcel Balootje
