SOLO DI PUEBLO ya a informa caba riba e situacion actual, unda tin un firmamento di tereno na cantidad ta tumando lugar, na tamañonan desproporcional pa huurgrond.

Segun nos por bin compronde, cu desde aña 2017, Gobierno a pone un paro na otorgamento di terenonan grandi, unda a opta pa parti terenonan grandi y duna mas otro hende e oportunidad pa haya tereno como huurgrond, destina pa plantacion o cria di bestia.

Pa por bini na remarke pa haya un tereno grandi, di 30.000 m2, bo mester bini cu un bon plan, un plan di negoshi, pa asina mustra cu realmente bo ta bay usa tanto tereno asina, hasiendo esaki como un negoshi.

Si no por presenta un plan di negoshi, e ora ey lo no por haya terenonan den grandura di 30.000m2, pero lo por haya tereno te cu 5000m2.

Actualmente, nos a bin compronde cu Minister Marisol a desvia di e maneho vigente, pa asina toch bay duna of prolonga terenonan grandi, contra tur regla of maneho vigente.

Den ultimo 48 oranan, nos a bin compronde cu masha hopi tereno grandi di huurgrond, contra relga, a wordo firma, y no ta un tereno pero mas cu 10 tereno, na tamañonan di 20.000m2, 21.000m2, 27.000m2, 26.000m2, 20.000m2.

Riba casi ningun di e terenonan aki tin plantacion ni cria di bestia hustificabel. Na algun tereno tin un casita cu algun carne, ni 15 carne, den un colosal tereno di 26.000m2. Un veld di futbol ta 4000 m2, pues aki nos ta papia di 7 x un veld di futbol.

Realmente e por ta un desperdicio di oportunidad, unda otronan cu si ta anhela pida tereno pa planta, no ta haya, siendo awor ta reparti 30.000m2, casi nos por bisa pa pret.

E fuente ta bisa cu e maneho a wordo viola, pasobra pa bini na remarke pa un tereno colosal di e tamaño aki, mester tin un plan di negoshi. Casi ningun di esunnan actual tin un plan di negoshi y como tal por bira y casi sigur lo bira un tereno pa pasa tempo.

LEAVE A REPLY

Please enter your comment!
Please enter your name here