Crea na Aruba y pa Aruba, Terra by Jeremy Ford ta duna bek na e isla cu tur dia ta inspira su cushina. Hunto cu Bucuti & Tara, e ekipo ta planta matanan nativo pa yuda proteha naturalesa, fauna local y comunidad di Aruba pa generacionnan venidero.
E siman aki, Chef Jeremy Ford, chef cu strea Michelin, hunto cu su talentoso ekipo Arubano di Terra by Jeremy Ford, e restaurant renombra na Bucuti & Tara Beach Resort, a cambia nan cuchiu di chef pa shobel. Nan a participa den un accion practico di plantacion, unda nan a planta matanan nativo den The Bucuti Tara – GMC Nature Preserve cu ta cubri 130,000 metro cuadra. Den e area aki, vegetacion nativo ta wordo restaura cu cuidou pa fortalece habitat di fauna local, biodiversidad y captura natural di carbono. Un terreno cu antes tabata vulnerabel pa desaroyo, awor ta florece como evidencia bibo cu turismo por contribui na restauracion, en bes di consumi. E esfuerso practico aki ta un danki di curason na e isla cu tur dia ta alimenta y inspira e restaurant, y na e resort cu Terra ta yama cas. Esaki ta tambe e prome paso den un compromiso duradero entre Terra y Bucuti & Tara pa contribui na restauracion di e paisahe natural di Aruba den e reserva natural di e resort.
Terra: un restaurant construi pa Aruba, di Aruba
Terra a wordo crea na Aruba y pa Aruba. E iniciativa aki ta refleha e mesun compromiso, cu awor ta haya expresion den un accion concreto pa beneficio di e naturalesa di nos isla. Chef Ford a desaroya e restaurant den colaboracion estrecho cu su socionan local, Maurice y Karim Neme, pioneronan Arubano di tercera generacion den industria di hospitalidad. Nan famia tabata entre e prome cu a contribui na desaroyo di hoteleria na Aruba. Hunto cu nan ekipo, nan a posiciona Terra como un concepto culinario autenticamente Arubano, cu ta honra historia di e isla, su productornan local y su comunidad. E compromiso aki ta refleha den cada plato, ya cu e restaurante ta traha cu agricultornan local y ta destaca e piscadornan Arubano cu ta trece piscanan fresco tur dia.
Pero loke di berdad ta haci Terra special, ta e hendenan cu cada anochi ta duna bida na e experiencia. Siguiendo un tradicion valioso cu Chef Ford ta implementa na tur su restaurantnan: nomber di cada miembro di ekipo ta aparece riba e menu y website di e restaurant, como un forma discreto pero significativo pa reconoce cu tur hende, for di cushina te den sala, ta comparti den e arte, dedicacion y orguyo cu Terra ta representa. E cushina ta lidera pa dos chef Arubano altamente aprecia: Executive Chef Jeanclaude Werleman y Chef de Cuisine Moises Ramirez, hunto cu nan ekipo Zachary Salomon, Christopher Webb, Dylan Cardona, Jazmin Briones, Jiayi “Nina” Yang, Ariana Alzamora, Giovany Leon, Giovanni Orbino y Juan Manuel Galvan. Na front-of-house, e experiencia ta wordo encarga pa e ekipo di Terra lidera pa General Manager Jessika Theysen hunto cu Zaira Werleman, Yulitza Osorio, Anoushka Geerman, Livan Meritè, Valeria Soto, Jennie Holmer y Cesar Garcia. Nan ta e curason y alma di Terra, y e rason pakico tur hende cu experencia Terra ta bolbe.
Terra tambe a uni su mes na programa di coleccion di restonan di cuminda di Bucuti & Tara, cu ta duna e materialnan aki un segundo uzo. E ekipo ta recicla restonan di preparacion y cascanan den preparacion pa usa den cocktail, saus y dressing. Loke resta ta wordo entrega na criadornan local di porco, evitando cu e material organico termina na landfill, unda e por contribui na emision di CO₂ y metano. E plantacion di palonan nativo ta representa e siguiente paso den e compromiso aki, fundamenta riba e conviccion cu cuida Aruba ta nifica cuida su tera, su awanan, su comunidad y su futuro.
“Pa mi, tur cos ta cuminsa cu tera. Prome cu mi ta chef, mi ta un agricultor cu ta kere den cultiva, nutri y duna bek. Planta e palonan aki den Bucuti Tara GMC Nature Preserve, hunto cu mi ekipo y nos partnernan di e resort, tabata menos un trabou y mas un gesto di gratitud. Aruba a duna nos un cas, un comunidad extraordinario y un ekipo cu su pasion ta inspira mi tur dia,” Chef Ford a comparti.
“Tambe e tawata un gran honor pa planta cu Mr. Ewald Biemans. Mi nunca a conoce un hende cu ta asina preocupa pa e futuro di su pueblo manera Mr. Biemans. Cada conversacion cune ta lagami mas inspira y e nivel di desaroyo sostenibel cu e la crea pa Aruba ta increibel. Awe, planta mata band’i dje a sinti mas grandi cu e momento mes. Ta un recordatorio importante cu proteha e espacionan berde di Aruba no ta solamente importante, sino parti di laga algo bunita atras pa e siguiente generacion.”
For di Ford’s Farm pa Futuro di Aruba: Chef Jeremy Ford ta Planta Simia di Sostenibilidad
E instinto agricola aki ta forma parti esencial di filosofia culinario di Chef Ford. A traves di Ford’s Farm na Florida, el a desaroya un vision culinario centra riba temporada, seleccion consciente di ingredientenan, practicanan cu ta limita desperdicio, y un respet profundo pa e conexion entre cuminda y tera. Chef Ford ta doño y lider di Stubborn Seed na Miami, un restaurant renombra cu a gana su di cinco strea Michelin consecutivo, como un Michelin Green Star. Esey ta dos di e reconocementonan mas exclusivo cu un chef por logra pareu. E mesun balornan aki ta forma base di Terra by Jeremy Ford, cu a habri na Bucuti & Tara na october 2025 y rapidamente a bira un di e experencianan culinario mas solicita di Aruba, cu Forbes describiendo e como “e restaurant mas busca di e isla.”
E colaboracion aki ta refleha e vision comparti entre Terra y Bucuti & Tara Beach Resort, e prome y unico resort certifica carbon-neutral den Caribe, unda hospitalidad y conservacion ta traha hunto pa proteha e ecosisteman vulnerabel y beyesa natural di Aruba.
Dicon The Bucuti Tara – GMC Nature Preserve ta importante pa futuro di Aruba
The Bucuti Tara – GMC Nature Preserve ta enfoca riba restauracion, reforestacion y proteccion di habitat natural. E area aki ta permanentemente proteha, garantisando cu e terreno no lo wordo desaroya y cu lo e keda conserva como un reserva natural pa Aruba y pa generacionnan venidero. Cada palo nativo planta den e reserva ta contribui na fortalecemento di biodiversidad, ecosisteman local y resiliencia di largo plaso di nos isla.
E reserva ta sirbi tambe como refugio pa fauna local di Aruba, incluyendo prikichi, wara wara y shoco, coneu, hunto cu un gran cantidad di especie nativo y propio di Aruba cu ta cumpli un rol esencial den mantencion di e ekilibrio natural di e isla. A traves di e iniciativa continuo aki, e reserva ta amplia e compromiso cu conservacion mas aya di e tereno di e resort, contribuyendo activamente na proteccion di e paisahenan natural di Aruba.
Mientras biaheronan ta busca cada bes mas experencianan significativo y consciente, colaboracionnan manera esaki ta demonstra con hospitalidad di luho y responsabilidad ambiental por laga un impacto positivo y duradero riba un destinacion y su comunidad local.
E prome accion di plantacion aki ta solamente e comienso. Chef Ford y e ekipo di Terra a compromete nan mes pa bolbe na e reserva temporada tras temporada, hunto cu Bucuti & Tara, pa sigui contribui tanto den tera como den cushina. E restaurant lo dedica menunan special pa recauda fondo pa e reserva, mientras su ekipo lo sigui hunga un rol activo y practico den e trabou di reforestacion. Bishitantenan y residentenan local ta cordialmente invita pa participa den e oportunidadnan di volunturismo cu e resort ta ofrece durante henter aña, pa contribui na proteccion di e beyesa natural di Aruba, mucho mas despues cu e experiencia culinario of estadia a conclui, y pa inspira tur hende pa laga e isla den un estado ainda mas berde y sostenibel.
