Tevreden na Mansur: Cuanto belasting abo a paga na pais Aruba?
Den un rueda di prensa, Sr. Hendrik Tevreden di MEP a reacciona riba e comunicado di Miguel Mansur unda e ta lansa critica fuerte riba Cristiannan y Iglesia. Sr. Tevreden a bisa cu di hopi tempo caba, e observacion cu tin riba Accion 21, desde cu el’a drenta parlamento bo ta mira e tipo di caracter y menasa cu e persona aki ta pa pueblo. Na promer lugar ela saca varios persona for di su partido, ora cu nan a expresa contra dje. Si algo mester pasa Mansur, e proximo pa bini den parlamento, lo ta un persona cu e mes a saca di su partido ( refiriendo na Sra. Lejuez).
Mansur ta un persona cu ta descrimina, e ta un bendepatria y e kier ta dictatorial. Den su articulo e kier perisgui esnan cu tin creencia Cristian.
Los cu el’a bay contra di esnan cu ta vocifera nan mes. Cada un di nos tin derecho a vocifera nos opinion. Tur manifestadoranan tin derecho pa protesta of trece un carta parlamento.
E articulo unda Mansur kier persigui Cristiannan y ta puntranan si nan ta contribui na e pais aki. Si Mansur no tabata sa, t’e cristian catoliconan ta esnan cu a crea scol den e pais aki y centronan di cuido. Ta e filosofia Cristian a percura cu nos tin ayudo social.
Mansur ta leuw di historia y no sa mes kico ta biba den e pais aki. Mansur a cuestiona nan contribucion financiero den e pais aki. Mansur a puntra Cristiannan si nan ta paga belasting.
Tevreden a puntra Mansur: Cuanto belasting abo a paga na pais Aruba? Mustra nos cuanto belasting abo a paga na Aruba. El’a haci inversion pafor di Aruba y awor kier bolbe pa saca probecho di e pais aki.
