En coneccion cu e campaña cu Aruba Excellence Foundation (A.E.F.) a lansa siman pasa, ‘E efecto di bo Zjeito’, a conmove mas hotel pa tuma e paso pa compromete y registra un gran parti di nan team pa certifica.

No menos cu 150 ‘Ladies and Gentlemen’ di The Ritz Carlton Aruba lo certifica cu e programa di certificacion di Aruba A.C.P. den luna di Augustus 2022.

Pa dos aña consecutivo The Ritz Carlton Aruba a sa di brinda oportunidad y flexibilidad di e schedule di operations na tur nan Ladies and Gentlemen pa asina por a sigui e programa di certificacion online.

E aña aki The Ritz Carlton Aruba lo participa den tur e 6 sessionnan face to face, pues ‘in-person’.

A.E.F. ta gradici tanto e Multi-Property Director of Learning & Talent Acquisition, sra. Desiree Bikker y Human Resources Manager, sra. Kim Geurtsen cu a haci nan sumo esfuerso pa haci esaki un realidad.

E programa di certificacion A.C.P. ta conta cu sosten di CEO di A.T.A. sra. Ronella Croes, como tambe di CEO di AHATA sra. Tisa LaSorte cu ta encurasha nan miembronan pa certifica y uni na e gran famia di embahadornan di Aruba cu orguyosamente por comparti informacion corecto y consistente di Aruba.

Aunke cu nos ta den fase di recuperacion nos por nota cu Aruba ta ricibiendo un fluho grandi di bishitantenan cu ta encanta nos isla y cu ta bastante satisfecho cu e servicio cu nan ta ricibi. Aruba ta sigui score halto den diferente aspecto cerca e bishitantenan, entre otro den e parti di ‘cleanliness’ y tambe e parti di ‘Guest Experience’. Pa es motibo ta evidente cu nos manera di brinda servicio excelente cu Zjeito ta indespensabel pa nos industria di Turismo. Na Aruba cada bishitante mester sinti su mes na cas, comodo y trankilo, esaki ta pone cu nan lo scohe pa bolbe nos isla pa experencia e mesun sentimiento cada bes nan tey.

E programa di certificacion ta beneficioso no solamente pa esnan cu ta labora directamente den e industria di Turismo, sino tambe pa tur otro organisacion cu tambe tin e papel di brinda servicio na clientenan, sea cu ta pa local of bishitante di exterior.

Durante luna di Juli te cu October 2022 por registra pa participa cu e programa di certificacion na e prijs reduci Awg. 50,- persona, embes di Awg. 100,- pa persona.

Pa mas informacion y registracion por tuma contacto cu oficina principal di Aruba Excellence Foundation na number 280 2924 of email info@acp.aw

Tambe por bishita www.acp.aw pa registracion online y usa e discount code ‘zjeito’.

Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.

LEAVE A REPLY

Please enter your comment!
Please enter your name here