Tienda di Educacion ta desea pueblo di Aruba un bon Pasco y un 2021 cu hopi positivismo. Aña 2020 ta den culmina faltando algun dia pa celebra den famia e nacemento di Niño Hesus y prepara pa cambio di aña. E dianan nos dilanti lo ta bay ta diferente cu e añanan anterior. Esaki ta momento pa reconecta cu nos mes y tambe nos famia manteniendo nos salud y di nos ser kerinan na prome lugar.
Nos mucha y hobennan lo tin un rato break di scol y naturalmente lo ta na cas durante e temporada. Mayornan lo tin e oportunidad di pasa mas tempo cu e yui(nan) y kisas ta desea di haci pregunta tocante topiconan cu ta encera lantamento di mucha. Akinan Tienda di Educacion t’ey pa scucha e mayor y duna un conseho con pa soluciona of atende cu e preocuapcion.
Tienda di Educacion cu su servicio telefonico di 161 lo keda accesibel den e temporada di fiesta cu orario nan adapta. Nos orario pa e siguiente dianan ta como lo siguiente:
- 23, 28, 29 & 30 December di 8 am – 4 pm
- 24 & 31 December 8 am – 12 pm
- 25 December & 1 Januari cera
Lo reaunda servicio telefonico di 161 entrante 4 januari na ora normal di 8 am – 8 pm di dialuna pa diabierna.
Nos di Tienda di Educacion ta pone enfasis ariba educacion di un yiu. Un sonrisa den cara di nos yiu por hasi milager. P’esey ta importante pa nos como mayor of educador trece alegria, aunke nos tin suficiente den nos mente, pa nos yiu (nan) tin un infancia y desaroyo sin mucho preocupacion. Nos ta sostene mayor, educador of cualkier persona cu tin e tarea pa lanta un mucha cu cualkier preocupacion of pregunta.
Bienestar y siguridad di nos mucha nan ta e responsabilidad di nos tur! Yama 161 pa cualkier pregunta tocante lantamento di mucha y hoben. Tienda di Educacion t’ey pa duna conseho y guia.
Cuida bo salud y alimenta bo mente cu positivismo! Ban lanta nos mucha nan cu amor y compasion pa asina crea futuro generacion nan sano di bon boluntad.
Di parti staff & personal di Stichting Tienda di Educacion nos ta desea henter pueblo di Aruba un feliz Pasco 2020 y un 2021 cu hopi positivismo, perseverancia y bondad.
