Den mayoria ocacion ora ta papia di inteligencia di un persona ta trata di e parti intelectual of mihor conoci na Inlges pa IQ (Intelegence Qoutient). Tin otro formanan di intelegencia tambe cu no ta solamente e IQ. Un otro forma ta locual nos conoce pa inteligencia emocional of mihor conoci na Ingles pa EQ (Emotional Qoutient). Abo como mayor of educador sa si bo inteligencia emocional a desaroyo suficiente of bo lo por reconoce bo yiu su inteligencia emocional? Ta pesey ta hopi importante pa nos refleha como mayor of educador na cual grado nos inteligencia emocional ta desaroya.
Desaroyo di intelegencia emocional cerca mayor
Inteligencia emocional por wordo observa tur dia cerca muchanan di tur edad. Tin biaha por wak un mucha of hoben ta mustra demasiado grandi den estatura of curpa compara cu otro muchanan di su mesun edad. Akinan mester para keto y reconoce cu aunke ta wak un mucha curpa grandi of di estatura halto no ta significa cu e mucha ta desaroya segun ta pensa. Tur persona y naturalmente tur mucha ta diferente. No por compara un mucha cu un otro. Cada persona tin un otro experencia den bida. Ta pa e motibonan aki ta importante pa mayor reconoce e fase di desaroyo di e edad di e mucha of hoben pa asina por adapta e manera di comunica cu e menor. Pa duna algun ehempel pa mayor reconoce cerca su mes y pa despues por practica e conocemento cerca e menor ta importante pa analisa e 5 elementonan di inteligencia emocional:
- Consciente di bo mes: siña conoce bo limite y tambe habilidadnan
- Consciente di por regula bo emocionnan: por controla emocionan di rabia of frustracion
- Grado di motivacion: maneha e desafionan cu ta bin ora di obstaculo pa keda motiva
- Grado di empatia: habilidad di por sinti y tin consideracion pa cu otronan
- Habilidadnan social: por socialisa cu otronan di un forma aceptabel y cu respet
Educacion ta cuminsa na cas
Siña conoce bo mes. Pone den practica e 5 elementonan di inteligencia emocional pa despues bo por reconoce esun di bo yiu(nan). Corda cu den cada fase di un mucha su desaroyo tin desafionan. Si observa bo yiu(nan) constantemente lo ripara cambionan chikito den e inteligencia emocional. Ta consciente di tur locual ta papia y bisa den cercania y na un mucha tene cuenta cu su edad, sin lubida e parti emocional. Mayor y tambe educador tin un tarea importante pa cu formacion di futuro generacion di hoben y adulto. Cuminsa for di chikito na cas ta practica. Educacion ta cuminsa na cas!
Tienda di Educacion
Mayor y educador, bo no ta para pa e retonan aki boso. Ta tareanan cu por mustra dificil pero Tienda di Educacion t’ey na disponibilidad di comunidad di Aruba pa duna e sosten y guia gratis. Por tuma contacto cu Tienda di Educacion na 161 cu ta disponibel di dialuna pa diabierna di 8 am pa 6 pm non-stop. Tambe por like nan Facebook page pa keda informa y tambe comunica tocante nan servicionan. Tienda di Educacion ta situa den edificio di Centro pa Hoben y Famia, Sabana Blanco 68-C y ta na servicio di henter comunidad. Nos muchanan ta nos futuro. Ban crea un futuro caminda muchanan por expresa nan emocion libremente sin miedo. Pa pregunta yama 161.
