Hende no por perde respet pa bida di hende.
Nos tur ta crea den imagen y semehansa di nos Dios, nos ta Su creacion y precioso den Su bista, Dios a crea homber y muher pa Su gloria y pa nan por multiplica y yena e mundo.
Dios a duna un mandato pa nos tur stima otro, y asina tin amor tin respet, pasobra pa bo stima un hende, bo mester respeta e persona, un esposo cu ta stima su esposa, ta respeta su esposa, un yiu cu ta stima su mayor, ta respeta su mayor, y asina esun cu ta stima su ruman/prohimo ta respeta otro.
Den ningun sircumstancia, nos ta yama pa perhudica otro den ningun forma, pasobra ora nos respeta otro den bista di Dios, tin recompensa y beneficio pa nos.
Un yiu cu ta honra su mayornan tin e bida largo riba e mundo aki y tur cos lo bay bon ( Efesionan 6:1-4) esey ta promesa di Dios y ademas un recompensa.
Un esposo cu ta trata su esposa bon , su oracion lo yega cielo, y esey ta un gran beneficio.(1Pedro 3:7) cu nos mester tene cuenta cune.
No ta importa color ni cabey, no ta importa edad, no ta importa posicion, ni tampoco puesto den comunidad, tur hende mester wordo respeta, no tin hende cu ta menos cu otro, pasobra Dios a crea tur hende segun Su imagen y Su semehansa.
Materialismo y envidia a drenta tur caminda, cu ta pone hende sinti nan mes mas cu otro, e arogancia ta domina asina profundo, cu hopi no ta ripara, ki ora arogancia ta dirigi nan bida y ta pone nan pensa cu nan ta mas cu otro.y ta lubida cu nada cu nos tin nos, no ta bay cune ora nos muri.
Laga amor ta sin hipocresia.aborece loke ta malo: Tene firme na locual ta bon.( Romanonan 12:9),
Pa nos tene duro na locual ta bon, nos mester mantene nos bista riba Cristo Hesus, kende a redimi nos for di scuridad y trece nos den Su lus.
Cristo Hesus ta e caminda di berdad y bida, e unico mediador entre Dios y e hende, nos unico y suficiente Salbador.
Maldad y inmoralidad ta bisti tur tipo di disfras, pa tumba hende, pesey ta necesario pa nos samina nos mes, y gara mas na Senjor pasobra e dianan ta malo.
Laga nos respeta tur hende, honra tur hende, stima bo ruman, no paga malo cu malo, tampoco insulto cu insulto, ma mas bien dunando un bendicion, pasobra nos a wordo yama pa e proposito aki ,pa nos por hereda un bendicion.
Laga nos tene cuenta cu esaki: Ora orguyo bin, deshonor tambe ta bini, ma sabiduria ta serca e humilde nan.(Proverbionan 11:2).
Un bon dia, un bon tardi, un bonochi, no ta kita nada for di ningun hende, pidi despensa ta base di tur educacion, ta demostra cu bo lanta den un cas cu etica, orden, moralidad y disiplina.
No imita hende cu mal manera, keda den bo cultura di decensia. No haci nada cu un actitud di egoismo of orguyo, ma cu humildad laga cada un di boso, considera e otro mas importante cu e mes.
No busca boso interes personal so, ma busca tambe interes di otro nan.( Filipensenan 2:3-4).
E palabra di Dios ta avisa nos di tempo trabahoso , y cuanto cambio nos lo mira den actitud di hende, pero corda tambe riba e dicho cu ta bisa: Gera avisa no ta mata solda, asina laga nos hala mas serca Senjor y haci mas oracion, y asina nos lo wordo proteha den e tempo aki.
Sinceramente, Pastor Marcel Balootje
