Tur dia ora nos lanta mainta, nos tin di gradici Dios, pasobra no ta algo religioso, pero e ta e gran berdad pa nos pasobra tin poder den e nomber di Hesus, hende por ninga, hende por rebeldia, hende por rechasa, pero si no tabata pa Dios nos lo no a lanta. Ta Dios ta dicidi ken ta lanta mainta y ken no ta lanta,pesey nos tur mester ta agradecido na Dios.
Mateo 1:21 ta para scirbi: Y elo hanja un Yiu homber, y lo bo dun’E e nomber Hesus, pasobra E ta Esun cu lo salba Su pueblo di nan picanan.
Mateo 1:23 ta para scirbi: Ata e birgen lo sali na estado,y lo hanja un Yiu homber, y nan lo duna e nomber Emanuel, cu traduci ta nifica: Dios cu nos.
Mateo 16;16; Simon Pedro a contesta y a bisa,Abo ta e Cristo, Yiu di Dios bibo.
Riba tur ambicion cu hende por tin, sea politico, ambicion pa rikesa, ambicion pa poder, no tin nada cu por surpasa e poder den e nomber di Cristo Hesus, den un palabra bisa, mas bo kere den e Nomber di Hesus , mas poder y autoridad e tin den bo bida, pasobra tur cos ta posibel pa esun cu ta kere.
Pesey ta tristo, pa mira ora hende cu ta creacion di Dios, pa falta di conocemento of rebeldia, ta haci tur cos pa kere den idolatria y bruheria, ta gasta placa, ta sacrifica, ta haci fiansa pa participa den baile y adoracion di Dios falso, mientras cu nan sa masha bon cu ta nan carni ta wordo satisface, pasobra ora necesidad, malesa, of problema presenta ta e nomber di Hesus ta wordo menciona.
E necesidad pa Cristo Hesus den nos bida, ta mas grandi cu awa, y rosea, pasobra si E no tey no tin nada. Pesey ta para scirbi cla den Romanonan 1:28-32 kico lo pasa cu esnan cu no ta hanja necesario pa reonoce Cristo Hesus den nan bida,
Tambe ta para scirbi den Galationan 5:19-21 cu esnan cu ta participa den obranan di carni, lo no hereda e reino di Dios.
Pero importante ta tambe cu ta para scirbi den Romanonan 10:13 cu Ken cu invoka e nomber di Senjor lo ta salba. Salbacion ta bini solamente y unicamente den e nomber cu ta riba tur nomber e nomber di Cristo Hesus.
Pesey Dios mes a presenta e plan di salbacion na henter mundo (Juan 3:16), sin exclui ningun hende, tur hende ta inclui, pasobra serca Dios nos tin discriminacion, tur hende ta welkom, pa asina tur cu kere den Cristo Hesus lo ta salba, y lo hanja bida eterna.
Y no tin salbacion den ningun otro,pasobra no tin bao di cielo, ningun otro nomber cu a wordo duna na hende, pa medio di cual nos mester wordo salba. ( Hechonan 4:12).
Den e nomber di Cristo Hesus tin salbacion, sanacion, liberacion, den e nomber di Hesus cadenanan di diabel ta wordo destrui, den e nomber di Hesus bida di hende ta wordo cambia, pasobra E ta E nomber riba tur nomber, e nomber den cual tur rudia mester dobla y tur lenga mester confesa cu Cristo Hesus ta Senjor.
No ta tempo pa practica, duresa di curason, ni tampoco capricho,ni tampoco falta di pordon, pero ta tempo pa nos tin temor di Dios, y duna Cristo Hesus e prome lugar den nos bida, pasobra E merece e prome lugar, pasobra sin Cristo Hesus nos no ta nada.
Nos por tin cos, pero nos mester di e presencia di Cristo Hesus.
Sinceramente, Pastor Marcel Balootje
