Crisis di servicio

Miles di hende tranca, economia paralisa

Tin un problema serio cu e servicio cu un departamento vital tin cu duna na pueblo. Ta trata aki di DIP, e departamento cu ta maneha cu tereno, erfpacht etc.

For di masha tempo caba a bin constata cu e departamento ta plat. Parce cu a tuma lugar masha hopi investigacion den e departamento unda ta sospecha cu hopi trahador a haci cos indebido.

Sinembargo tur esaki a trece cune cu e departamento a wordo paralisa, unda cu hendenan no ta hayando contesta pa asina por sigui encamina nan proyecto, nan cas, of renobacion di nan erfpacht.

Varios inversionista cu ta pidi cierto tereno pa asina por construi un negoshi ( den tur humildad, no manera corupcion den tempo di Benny) tampoco ta wordo atendi.

Extension di tereno di cas, tampoco ta wordo atendi. Pues, tin un cantidad di servicionan cu ta lam lam.

Ora bo asumi cu MEP, cu te partido cu ta supose di dirigi e departamento, y kisas haci un schoonschip, manda cas esnan cu mester bay y pone nobo na nan lugar, parce cu nada ta tumando lugar.

Por sinti un fadamento grandi den pueblo, principalmente unda ta parce cu nada ta wordo haci.

Hendenan cu tin carta di di banco, tin placa pa asina cumpli cu e rekisito pa haya tereno, ta wordo nenga, pasobra cu fecha a caduca, pero DIP no kier tene na cuenta cu tabatin 3 luna di pandemia y banconan local a stop di presta placa y hasta a stop di traha.

Pues, ni flexibilidad DIP no tin mas pa mira cada caso por separa, pero ta just pasa pen cora den forma generico, perhudicando cientos di famia cu tin placa, cu tin capacidad, pero pasobra mester a renoba un carta na banco, y cu esey a tarda 10 dia adicional, a pasa pen cora den nan tereno.

Esaki no ta abuso? ta kico ta abuso anto?

Realmente a perde tur speransa cu MEP por drecha e situacion aki, pasobra ta pasa lunas tras di luna y DIP ta keda status quo.