Por evita critica infunda si amplia conocemento financiero
ORANJESTAD – Minister di Finansa a tuma nota cu recientemente atrobe ta circula informacion incorecto di finansa publico di Aruba. E biaha aki a trece e critica dilanti cu Gobierno a tuma 196 hende den servicio den temporada di Covid siendo cu ta corta den salario di e empleado publico. E informacion aki NO TA CORECTO. Cifra di Departamento di Recurso Humano cu ta wordo publica den e ‘Uitvoeringsrapportages’ URK di e añanan 2019, 2020 y 2021, ta mustra un bahada di 193 persona den servicio di Gobierno durante e pandemia.
Den e grafico adhunto por mira cu e cantidad di personal den servicio di Gobierno desde aña 2018 a bin ta bahando y den e añanan di pandemia 2020 y 2021 e cantidad di personal a baha cu 193 fte, 114 fte di 2019 pa 2020, y 79 fte di 2020 pa 2021. En total Gobierno tabata tin den aña 2019 un total di 4743 empleado den servicio publico, den aña 2020 e cifra aki a baha na 4629 empleado y na 2021 te cu kwartaal 3 a baha bay na 4550 empleado.
E bahada den cantidad di empleado publico ta refleha tambe den e gastonan di personal cu ta bahando y ta kedando bou di e plafond di e gastonan di personal acorda cu Hulanda na november 2018. Na aña 2019 promer cu e pandemia, e gastonan di personal tabata 475 miyon florin, den aña 2020 esaki a baha na 428 miyon y den aña 2021 te cu e tercer kwartaal e gastonan di personal a baha te cu 317 miyon florin. Mester remarca cu e bahada den e añanan di pandemia tambe a wordo influencia pa e efecto di e recorte di 12,6% necesario pa por cumpli cu e condicion di Hulanda pa baha gasto di personal pa por haya sosten di likidez den forma di fianza. E informacion aki ta publico, ta wordo publica tur kwartaal den URK y ta disponibel riba www.gobierno.aw.
Minister Maduro ta lamenta cu critica ta wordo lansa cu ta crea polemica innecesario den comunidad. Por evita hopi critica infunda si esnan cu ta critica haciendo uzo di cifranan di finansa publico, tuma tempo y amplia nan conocemento financiero. Gobierno na varios ocasion, por ehempel, a extende un invitacion na e sindicatonan pa nan forma parti di un comision financiero pa asina nan por ricibi informacion financiero mas detaya y haya e splicacion necesario pa e dudanan cu nan por tin. Lamentablemente te ainda sindicatonan no a haci uzo di e oportunidad aki.
