𝘔𝘪𝘯𝘪𝘴𝘵𝘦𝘳 𝘋𝘢𝘯𝘨𝘶𝘪 𝘖𝘥𝘶𝘣𝘦𝘳
ORANJESTAD – Diamars mainta Minister di Turismo y Salud Publico sr. Dangui Oduber a tene un conferencia di prensa na Museo Arquelogico Nacional Aruba (MANA).
Aki e mandatario a firma acuerdo entre TPEF y MANA. Cu e acuerdo firma aki ta bay renoba parti di e edificio di MANA. Esaki ta bay bira un otro proyecto cu lo wordo financia pa Tourism Product Enhancement Fund (TPEF).
E mandatario a splica cu TPEF ta un fondo di presupuesto cu ta haci inversionnan den embeyesimento di producto Aruba. E fondo ta inverti tambe den nos herencianan cultural y ta mantene nos costanan limpi. TPEF a bin ta financiando varios proyecto rond di Aruba pa cu nos turismo.
MANA ta forma parti di nos herencia cultural. Segun Minister Oduber, awendia, mas y mas turistanan cu ta bishitando nos isla ta puntra pa bishita lugarnan manera un museo. Esakinan ta turistanan cu ta interesa pa conoce y wak parti di Aruba su herencia. Pa e motibo aki e renobacion di MANA ta importante pa nos por brinda un producto di calidad na nos bishitantenan.
Minister Oduber a indica su maneho di turismo ta dirigi na trece turismo di calidad, pa trece e turistanan afluente. Ta sigui enfoca den diversificacion di nos turismo. Keda haci inversionnan continuo den producto Aruba. Keda enfoca den e strategianan nobo di mercadeo pa asina nos keda mas competitivo.
Cultura ta un parti importante cu gobierno kier brinda na nos turistanan. Pe motibo aki ora MANA a acerca e board di TPEF y a presenta nan masterplan pa cu e museo, sin duda a duna e proyecto aki su atencion debido. Nan a puntra TPEF pa yudanan realisa e proyecto y TPEF mes ora tabata habri pa financia e proyecto pero den varios fase. Ora e proyecto aki finalisa e museo lo mester tin un galeria di arte hopi moderno. Aki lo por tene diferente exposicionnan tanto pa nos turistanan como local.
Turismo ta e driver di nos economia y pa esey ta importante pa nos keda inverti den nos producto Aruba. Finalmente e mandatario a gradici e Board di TPEF pa aproba e fond y danki tambe na MANA y tur cu ta bay haci e proyecto posibel.
