—- Cuerpo Policial Ta Informa—-
UN SEÑORA DI EDAD TA FAYECE DEN CAS NA MADIKI CU A PEGA CANDELA
Diadomingo pa 01:26 di marduga central di polis ta wordo notifica di un candela na un cas na Madiki.
Ta despacha patruya di polis y como tambe brandweer.
Na yegada di patruya ta topa cu un cas candela.
Brandweer tambe ta yega na e sitio y ta cuminsa mesora na combati e candela.
Un rato despues ta bin compronde di esnan cu ta biba eynan y rond den vecindario cu aparentemente tin un señora den cas ainda.
Brandweer a logra paga e candela y despues a bay controla den cas y a bin topa cu un curpa sin bida.
Di biaha a pone recherche, polis technico,Slachtofferhulp como tambe e dokter forensico na altura.
E victima ta un hende muher di inicial Clomene Pierre naci na Haiti dia 6 juli 1960.
Cuerpo Policial ta manda palabra di condolencia na famia di e fayecida.
