Den un carta habri fecha dia 10 di april 2026, un grupo di trahado di Serlimar a expresa nan disgusto profundo contra e Gobierno actual. E trahadonan ta denuncia un serie di iregularidad interno y ta declara nan mes cla pa drenta den accion si no bin un cambio inmediato den e maneho di e compania di sushi.
Privilegio y posicionnan cuestionabel
Segun e trahadonan, den ultimo tempo a surgi un “management team inoficial” den Serlimar, consistiendo di personanan privilegia cu ta tuma decisionnan cu un tinte politico. E malcontento ta grandi pasobra varios di e personanan aki a ricibi funcionnan nobo cu aumento di salario, sin cu nunca a publica un vacatura pa e posicionnan ey.
Un di e casonan mas resaltante cu nan ta menciona ta e nombracion di un persona cu anteriormente tabatin prohibicion pa subi tereno di Serlimar. E persona aki a wordo reincorpora como chauffeur di truck, pero cu autorisacion di Gobierno, el a wordo nombra como Hefe di Supervisornan cu un schaal hopi halto. E trahadonan ta afirma cu e individuo aki ya ta haciendo bida di e personal imposibel, y tambe nan ta cuestiona creacion di posicionnan nobo cu nunca a existi, solamente pa acomoda e grupo selecto aki.
Desperdicio di fondo y menosprecio
Mientras e “grupito privilegia” ta disfruta di oficinanan bunita drecha, toelagenan halto, “business lunches” y orarionan flexible, e trahadonan cu pa varios aña a carga e compania ta sinti nan menosprecia. E carta ta enfatisa cu tin un gastamento di placa excesivo na cosnan cu no ta prioritario, locual ta tranca e progreso di e empresa.
“No tin placa pa aumento p’e trahadonan cu semper a traha duro, manera cu Gobierno a priminti durante campaña, pero si tin placa pa compinchinan politico,” e trahadonan a splica den e documento. E ploegnan cu ta traha den higra di solo tambe a keda na spera riba e aumentonan priminti, locual nan ta considera awo como promesanan bashi sin ningun balor real.
Ultimatum na Gobierno
E situacion a yega na un punto unda e personal no ta acepta e division bisto entre e trahadonan mas. Nan ta acusa e maneho di faboritismo i di maluza e recursonan di e compania pa interesnan partidista.
Pa e motibo aki, e trahadonan di Serlimar ta lansa un ultimatum directo na Gobierno pa reacciona riba nan kehonan. Nan ta adverti cu, si no ricibi un respuesta satisfactorio, nan ta cla pa drenta den accion pa defende nan derechonan y exigi e respet cu nan merece como e forsa laboral cu ta tene e isla limpi.
