E di cinco edicion di No Mas No More a tuma luga na Sint Maarten di 16 pa 19 di juni. Durante e reunion aki profesionalnan di tur seis isla di e parti Caribense di Reino a bin hunto. Representantenan di Ministerio di Salubridad, Bienestar y Deporte (VWS), Enseñansa, Cultura y Ciencia (OCW) y Husticia y Siguridad (JenV) tambe tabata presente.
E mensahe central di e conferencia di trabou tabata cla: ta importante pa nos traha hunto na ratificacion di e Tratado di Istanbul. E tratado aki ta concerni prevencion y combatimento di violencia contra hende muhe y violencia domestico.
Durante e conferencia di trabou a traha riba plannan di accion riba seis tema: igualdad di genero, ordo di proteccion temporal y metodonan di “time-out”, salud mental relaciona cu violencia domestico, cambio di comportacion como parti di campañanan di conscientisacion, coleccion di dato y asistencia na personanan indocumenta den situacionnan di violencia domestico. E temanan aki ta directamente mara na varios articulo di e Tratado di Istanbul.
E puntonan clave di e MoU, cu e islanan a firma durante e ultimo conferencia di No Mas No More, tambe a keda incorpora den e plannan di accion. Ta trata di e siguiente temanan: colaboracion den Reino entre shelter pa victima, codigo di proteccion, investigacion, conscientisacion, comparti conocemento y desaroyo di experticio.
E tema di e conferencia aki ta mas cu un lema — e ta representa un compromiso pa accion concreto. E encuentro aki no ta djis tocante cada ken su asistencia; presencia di cada persona a amplifica un mensahe poderoso di resolucion colektivo. No Mas, No More, Ni aki, Ni Niun Caminda,” asina Minister di Salubridad Publico, Desaroyo Social y Labor di Sint Maarten, sr. Richenel Brug, a bisa.
E grupo di trabou No Mas No More, cu ta consisti di miembronan di tur seis isla y di Ministerio di Salubridad, Bienestar y Deporte, lo sigui traha riba elaboracion di e plannan di accion riba nan propio islanan despues di e conferencia, hunto cu partnernan di cadena, den e cadena di husticia y sosten.
E conferencia tabata un exito. Tabatin hopi espacio pa comparti conocemento, experiencia y ideanan. E participantenan a regresa nan islanan cu un vision renoba y plannan concreto pa sigui construi un futuro sigur pa un y tur.
