Prome Minister mr. Mike Eman a reuni dialuna atardi cu Dave Martinus di “Scouting Aruba”, Christopher Lake di “Scouting & Leadership Movement” y Seuwjen Falconi di “Het Arubaanse Padvindsters Gilde”. E tabata un encuentro constructivo tocante e futuro di e organisacionnan, nan contribucion den nos comunidad y funcion durante celebracion di nos dianan nacional. Durante e reunion, a intercambia pensamento riba diferente programa y actividad cu por desaroya den e lunanan venidero. Tambe a dialoga tocante e importancia di involucra mas organisacion y stakeholders den esfuerso pa fortalece nos comunidad y promove participacion di organisacionnan den formacion di nos hobennan den bario.
Prome Minister Eman a expresa su aprecio p’e trabou balioso cu e organisacionnan di scouting ta desempeña den formacion di nos hobennan. E organisacionnan ta yuda desaroya varios norma y balor importante den nos hubentud manera respet, disciplina, responsabilidad y liderazgo, algo cu ta fundamental pa construi un comunidad fuerte.
Gobierno ta mira cu hopi entusiasmo e posibilidad pa traha mas di cerca cu tur organisacion di scout y otro organisacion similar cu tin nos comunidad na pecho, cu meta di crea mas oportunidad pa nos hobennan, fortalece e cohesion social y contribui na un Aruba unda participacion, formacion, solidaridad y harmonia ta central.
