Minister Geoffrey Wever:
Awe Minister Geoffrey Wever, a ricibi bishita di rector magnificus Prof. Dr. Viola Heutger, associate professor mr. Dr. Carlos Bollen di Universidad di Aruba y Abogado- General anterior di Corte di Husticia Europeo Prof. Dr. Verica Trstenjak. Meta di e bishita ta continuacion di duna contenido na e rol cu Universidad di Aruba por hunga den implementacion di maneho pa proteccion di consumidor.
Vision di ministerio di Asuntonan Economico, Comunicacion y Desaroyo Sostenibel ta un consumidor consciente y critico. Pa garantiza e meta aki ta esencial proteha derechonan di consumidornan.
Den un intercambio ameno, minister Geoffrey Wever, sra. Viola Heutger, sr. Carlos Bollen y Prof. Verica Trstenjak a elabora riba e rol di gobierno den maneho pa proteccion di consumidor y e importancia di un Consumentenbond pa Aruba. Tambe a enfoca riba e rol di Universidad di Aruba den e trayecto di implementacion, basa riba e expertisio y experiencia amplio di Universidad riba e tema aki.
Minister Geoffrey Wever kier a gradici sra. Viola Heutger, sr. Carlos Bollen y Prof. Verica Trstenjak pa e bishita y cooperacion pa asina duna contenido na e proteccion di nos consumidornan.
