Informacion cu a yega na nos mesa di redaccion ta mustra riba un trampa cu un tramitadora di permiso ta usa contra nan cliente, pa asina abusa di nan, cobra nan placa y engañanan. Segun e informante, e tramitadora aki ta opera for di un kiosko.
E trampa cu permiso ta funcciona di e siguiente forma:
Ora un persona bini Aruba pa bin traha, e persona mester pasa via DPL. Esaki ta pa screen funccion y pa confirma si tin espacio pa dicho funccion. Den e caso aki, e persona ya a haya un permiso di 2018. Awor e ta den proceso pa renoba permiso di 2021.
E tramitadora supuestamente ta manda yena vacatura na DPL, pues haci e screening. Automaticamente na DPL bo ta haya un checklist, ta mustra tur rekisito cu bo mester pa procesa e vacatura na DPL.
Den e caso spesifico aki, un senjora tramitadora a manda papel DPL. pero ora cu e donjo di curpa a bay DPL, a bin constata cu tabata falta e carta di autorisacion pa e tramitadora, hunto cu paspoort.
Ora bo ta haci peticion na DPL, bo ta haya un fecha di entrega, y un fecha di clausura, of completacion. Den tres siman e vacatura ta cera y ta sigui e proceso di toelating.
Kico a pasa?
E persona concerni aki no tin ningun fecha di DPL, ni fecha di entrega ni completacion. Sinembargo, e tramitadora, a bay DIMAS cu un carta di DPL bieuw. Pues, ta purba na haci triki cu trampa den e sistema laboral, usando documento bieuw.
Kico te consequencia?
E trahador ta wordo yama dor di DIMAS pe bay paga su permiso, pero e mester presenta e documento di DPL, cual e cliente no tin, pasobra e tramitadora a usa un bieuw.
Dje forma aki algun tramitadora ta engaña nan cliente, y despues ta instiga clientenan riba Gobierno y DIMAS, sinembargo ta e tramitadora mes ta esun cu ta haciendo un acto ilegal.
Ta bira ora cu Gobierno mester regula e trabao di tramitadora, y acredita e tramitadoranan pa traha sincero cu nan cliente y no por ta asina cu nan ta tira para, kita placa y engaña cliente.
Amnestia:
Tambe tin un tramitadora di kiosko ta ofrece amnestia na trahadornan di exterior, contra pago di Afl. 500.00. Ningun rato a scucha cu Gobierno ta dunando amnestia, pues ta otro triki cu trampa ta wordo traha unda trahadornan stranhero ta cay aden.
