Corte den Prome Instancia a trata e caso penal contra e sospechosonan G.G.G.O., M.G.J.M. y J.R.R. den e asina yama caso Anglo. E ex-contratistanan aki di departamento di salubridad (DVG) ta wordo acusa di a haci registronan falso durante e campaña di vacuna y di a haya pago pa haci esaki.
Investigacion a mustra cu a registra sigur 60 vacuna na orarionan cu e post di vacuna tabata cera ainda. Tambe a haci un cantidad di registro desde cas di un di e sospechosonan. Diferente persona cu ta aparece riba e lista di registronan a wordo scucha como sospechoso y nan a declara cu nan a paga pa un prueba di vacuna. E sospechosonan mes ta bisa cu ta trata di 5 pa 11 registro.
Ministero Publico ta acusa e sospechosonan di a participa na un organizacion criminal cu a comete hechonan castigable, esta, registra pruebanan falso di vacuna. Ademas nan ta wordo acusa di corupcion como ambtenaar. Un di e sospechosonan ta wordo alavez acusa di posesion di cocaina.
E sospechosonan aki a desacredita Pais Aruba cu nan actonan. Den un temporada di medidanan y restriccionnan nan a haci maluso di nan posicion puramente pa ganashi financiero.
E confianza cu por tin den e campaña di vacuna y e status cu un prueba di vacuna Arubiano por tin, a bay na discusion, dor di nan manera di actua. Den un pais manera Aruba cu ta depende di turismo, esey ta algo sumamente dañino, na opinion di Ministerio Publico.
Pa e razonnan aki fiscal a exigi durante e tratamentonan castigonan di prison contra e sospechosonan O. y M. di respectivamente 18 luna, di cual 12 di condicional. Contra e sospechoso R. fiscal a exigi un castigo di prison di 22 luna, di cual 18 ta condicional. Fiscal a exigi contra tur tres sospechoso castigo di trabao pa comunidad di 240 ora y un multa di 2.500 florin.
Tambe a pidi Corte pa lanta e suspension di nan detencion preventivo, pa asina e sospechosonan lo por wordo traslada mes ora pa KIA pa sinta nan castigo di prison, si en caso Huez haya nan culpable.
Huez lo dicta sentencia riba 8 di juli venidero.
