Den luna di mei Prome Minister mr. Mike Eman lo forma parti di tres evento importante cu lo marca e luna aki pa Aruba, tur enfoca riba fortalecemento di e relacionnan internacional, cooperacion dentro di Reino Hulandes y posicion di Aruba den region.
Delegacion di Aruba na inauguracion di presidente nobo di Costa Rica
Un di e prome momento importante lo t’e participacion di Aruba na ceremonia oficial di inauguracion di presidente nobo di Costa Rica, Laura Fernández Delgado. Prome Minister Eman lo encabesa un delegacion oficial pa e evento durante e prome siman di luna di mei.
E relacion entre Aruba y Costa Rica ta uno cu ta data di hopi aña atras y di gran balor strategico. Anteriormente Gobierno di Aruba tabatin un iniciativa hunto cu Utilities Aruba N.V. y Carbon War Room, unda ex-presidente di Costa Rica José María Figueres a hunga un rol clave pa Aruba. E relacion aki no solamente ta historico, pero ainda vigente y relevante pa futuro.
Bishita oficial di Prome Minister Hulandes na Aruba
Un otro evento clave lo ta e bishita oficial di Prome Minister di Hulanda, Rob Jetten, cu lo tuma luga den region Caribe entre 8 y 14 di mei, incluyendo Aruba riba 12 y 13 di mei.
E bishita aki ta su prome como Prome Minister den e parti Caribe di Reino y ta subraya e importancia cu e gabinete Hulandes ta duna na un colaboracion fuerte entre e paisnan.
Durante su estadia na Aruba, e programa ta inclui, entre otro:
- Presencia durante estreno di un documentario riba naturalesa di Aruba
- Bishita na Parke Nacional Arikok
- Actividad na Centro Deportivo Libertador G.F. Betico Croes
- Bishita empresarial den cuadro di e programa microcredito (Qredits)
- Recorido na Aeropuerto Internacional Reina Beatrix
E bishita lo brinda oportunidad pa dialogo directo riba tema di importancia mutuo manera sostenibilidad, siguridad y desrroyo economico.
Agenda internacional na Hulanda y participacion den instalacion oficial
Finalmente, Prome Minister Eman lo ta Hulanda mas na final den e luna di mei pa sostene varios reunion importante cu miembro nobo di e Gobierno Hulandes.
E agenda ta inclui encuentro cu diferente personahe clave pa continua y fortalece relacionnan dentro di Reino, manera tambe participacion den ceremonia oficial di instalacion di Minister Plenipotenciario Mildred Schwengle na Den Haag.
Tur esaki ta refleha e compromiso di Aruba pa mantene un rol activo tanto den region como dentro di Reino Hulandes. Mei lo ta un luna di contacto, cooperacion y posicionamento pa Aruba, unda ta fortalece varios relacion y traha pa futuro di nos isla.
