Diadomingo trempan den oranan di mainta tres hoben tabata tin e pudor di drenta den e cura patras di warda di polis, probablemente nan lo a tira algo paden, net unda e celnan ta, unda polis ta cera sospechosonan.

Aparentemente Polis lo a mira movecionnan straño patras di Warda, unda tin e celnan. Polisnan no a confia esaki y a bay tira bista. Nan lo a mira tres personanan sali core bay.
E polisnan mesora a core nan tras.

Den cura di un negoshi un poco mas pazuid di Warda, nan a bin topa cu un di e personanan, cual tabata un mucha muhe hoben. E dama a wordo mesora deteni y hiba warda pa mas investigacion.

Mas polis lo a wordo pidi pa yuda busca den area di warda di Shaba p’e otro dos personanan.

Tambe na momento cu polis tabata buscando nan a bin nota cu e cura di hero a wordo destrui.
Departmento Tecnico di polis tambe a wordo pidi na warda di polis na Shaba, pa haci mas investigacion.

No ta prome biaha cu algo asina ta sosode den pasado esaki tabata sosode na warda di polis di Santa Cruz. E tempo ey un cantidad di tralie di e cura di hero a wordo kibra of dobla y cu facilmente hende por a pasa bay den e cura y yega cerca te unda e celnan ta.
E habitantenan di e casnan patras di e warda a yega di conta, cu anochi nan tabata mira hende pasa riba nan tereno bay den cura di Warda y asina tabata combersa cu nan amigo of famia cu tabata deteni.

Lo ta bon pa den futuro traha curanan halto di beton, cu prikkeldraad y tambe instala un bon sistema di camara di Seguridad, pa asina evita cu sospechosonan tin contacto cu hendenan di pafo, prome cu algo mas serio sosode.

LEAVE A REPLY

Please enter your comment!
Please enter your name here