Tres studiante medico cu ta traha na un hospital pa pashentnan cu COVID-19 den e provincia Ruso di Leningrad a wordo sorprendi e mainta di diamars pa un colega, kende a saca un potret di nan descansando abao despues di a pasa un anochi di vigilancia hunto cu e cama di un pashent.
E imagen, publica riba e website di e hospital, a bira viral na Rusia y varios medio di comunicacion a contacta cu e protagonistanan di e storia.
Rasul Nazarov, un di nan, a conta RT cu e y su compañeronan, Yekaterina y Alexei, a wordo yama pa 2’or di marduga pa yuda un pashent den ICU cu a cuminsa sufri un atake di panico.
“Pa e momento ey, ya nos a finalisa nos shift di e dia anterior (…) y a bin otro hende. Pero tabata tin asina tanto trabao cu nos mester a bay bek na e hospital pa 2’or di marduga,” e hoben a relata.
E pashent tabata conecta na un respirador, pero despues di a sufri un atake di panico, el a cuminsa kita e mask di oxigeno, loke a haci cu su nivel di oxigeno den sanger a cay di inmediato.
“E no a compronde e ora ey loke tabata pasando,” e trahado di salud a splica, comparando e sensacion cu e muhe a experimenta cu e panico di un persona cu ta hoga.
E studiantenan e ora a purba di trankilis’e mientras cu nan tabata wanta su mask di oxigeno. “Ora cu e muhe a calma un poco, nos a drumi abao, pasobra por lo menos tabata un poco friu.
Riba e foto por parce cu nos tabata drumi, pero en realidad, nos tabata abao vigilando e pashent, observando e monitornan,” Rasul a afirma.
Actualmentee estado di e pashent ta satisfactorio, mientras cu su tratamento ta sigui, na momento cu e tres hoben a converti den un simbolo di e lucha contidiano di miles di trahado di salud contra di COVID-19.
