ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e hombernan R.R.T. (19), Y.A.B. (25) y e dama J.B. (35). Tur tres acusado ta biba na Aruba. Nan ta wordo acusdo di a purba exporta 4 kilo di cocaina den un avion.
SOLO DI PUEBLO por a compronde cu e exportacion a fracasa ora autoridad a sorprende R.R.T., kende kier a hinca un faha cu e 4 kilo di cocaina den un maleta cu tabata den avion.
EXPORTA 4 KILO DI COCAINA
Hues bisa cu R.R.T. a admiti na Polis cu e ta envolvi. Segun su declaracion na Polis, el a haya un faha di Y.A.B. cu 4 kilo di cocaina aden. Y.A.B. a bisti’e e faha y mira si e ta riparabel. Ta asina cu R.R.T. tabata traha pa un compania na aeropuerto cu ta encarga cu hinca maletanan den avion. Y.A.B. tambe tabata traha pero a wordo kita algun dia promer. Door di esey, Y.A.B., cu a accepta e oferta di e dama J.B. a acerca R.R.T. caminda a ofrece 1500 dollar. E palabracion ta cu R.R.T. lo drenta aeropuerto cu e faha bisti na su curpa y despues lo hinca esaki den un maleta cu lo bay den avion. Na aeropuerto, R.R.T. a miss call Y.A.B. pa laga sa cu e ta paden. Y.A.B. a manda R.R.T. potret di e maleta den cual mester hinca e faha. R.R.T. tabata den e avion y a tende cu autoridad ta bay controla e maletanan. El a spanta, kita e faha, bent’e banda di e maleta y core bay. Miembronan di autoridad a mira e movecionnan sospechoso aki y a logra detene R.R.T. Den Corte, Hues a puntra R.R.T. si e tabata sa cuanto droga e tabatin. R.R.T. a bisa Hues cu e no sa cuanto droga tabatin den e faha. El a bisa cu e tabata interesa den e placa pasobra e tabata den situacion financiero dificil.
J.B. a declara na Polis cu el a wordo acerca pa un taxista pa hiba droga y el a accepta. J.B. a acerca Y.A.B. pa haci esaki. Na dado momento J.B. kier a distancia pero door di menaza e mester a sigui. Den Corte J.B. a bisa Hues cu e tabata cana cu su yiu y for di un auto color scur, un persona a saca man manera ta un pistool y haci manera ta tira riba dje y su yiu. Esey a pone cu el a sigui cu e exportacion di cocaina. El a acerca Y.A.B. y Y.A.B. a bay di acuerdo. El a haya un faha y a duna Y.A.B. esaki. Ora Hues a puntra J.B. si esey ta e faha cu R.R.T. a haya, el a bisa cu e no conoce R.R.T. y no a dun’e faha. J.B. a bisa cu el a duna Y.A.B. 2 mil dollar y despues a duna e pareha di Y.A.B., 1 mil florin ora cu Y.A.B. a cay sera.
Hues a bisa cu Reclasering a traha raport di R.R.T. Ta asina cu R.R.T. ta usa marihuana y lo ta bon si e ta haya ayudo pa e stop di usa. R.R.T. a bisa Hues cu e ta di acuerdo cu esey. Tambe Reclasering ta conseha pa R.R.T. sigui curso di controla agresion. R.R.T. a bisa Hues cu antes e tabatin e problema ey y a sigui curso y ta bou supervision di Reclasering.
FISCAL A EXIGI CASTIGO COMBINA
Fiscal a bisa Hues cu R.R.T. tabata traha na aeropuerto y 7 October 2023, el a haya un faha cu droga. Na dado momento R.R.T. a spanta cu lo bay controla avion y a core bay. Asina a detene R.R.T. y el a bisa cu ta Y.A.B. a dun’e faha pa e hinca den un maleta. Y.A.B. a mand’e potret di e maleta den cual e mester hinca e faha cu droga aden. Fiscal a sigui bisa cu J.B. a wordo interoga y a bisa cu un chofer di Taxi a bis’e pa hiba droga. Fiscal ta haya cu tur tres tabata envolvi den exporta cocaina. Pa cu e castigo, Fiscal a bisa cu e ta tene cuenta cu tur tres acusado awor tin trabao. Tur tres a haci’e door di situacion financiero dificil. Tambe Fiscal a mustra cu J.B. a wordo menaza. Fiscal a exigi trabao pa comunidad di 200 ora of 100 dia sera. Tambe el a exigi 1 aña di prison condicional cu 3 aña di prueba.
ABOGADO
Abogado mr. Carlo di R.R.T. a bisa Hues cu R.R.T. a hay’e ta haci algo cu a cambia su bida. E tabata traha pa un compania na aeropuerto pa hinca maletanan den avion hunto cu Y.A.B. Ta asina cu Y.A.B. a wordo kita y el a pidi R.R.T. pa pone e faha den un maleta den un avion pa asina e droga wordo hiba. El a wordo sorprendi durante control di autoridad y el a core bay pero a wordo gara. Ta door di situacion financiero dificil, el a dicidi di haci’e pero e no a resulta. Mr. Carlo a bisa Hues cu R.R.T. a coopera completo cu investigacion. El a pidi Hues pa duna castigo igual na loke el a sinta caba.
Abogado mr. Falconi di e dama J.B. a bisa Hues cu J.B. a actua bobo, a wordo menaza door di e chofer di taxi y tabata den un situacion financiero malo. El a pidi Hues pa tene cuenta cu e situacion familiar di J.B., kende tin 3 yiu.
Abogado mr. Edwards a bisa Hues cu Y.A.B. su participacion tabata minimal. Door cu el a wordo kita for di e compania na aeropuerto, el a acerca R.R.T. pa haci e trabao di pone e faha cu droga den e maleta. El a wordo acerca promer door di e dama J.B. E abogado a mustra cu J.B. ta purba tira culpa riba Y.A.B. siendo cu ta J.B. ta esun na cabez. E abogado a mustra cu Y.A.B. a bisa Polis cu e no a haya ningun cen. No ta asina cu el a haya casi 4 mil florin.
SENTENCIA
Hues a sera tratamento di e caso y a dicta sentencia di biaha. Hues ta haya tur tres culpable di complice di exporta cocaina. Tur tres tabatin un funcion pa e droga aki bay den exterior. Ta 4 kilo di cocaina nan kier a manda pa exterior. Hues ta haya cu e exigencia di Fiscal ta na su lugar, Pa cu e castigo, Hues a bisa cu teniendo cuenta cu tur tres ta lamenta loke a sosode y actualmente tin trabao, el a confirma exigencia di Fiscal. R.R.T., Y.A.B. y J.B. a wordo condena na 200 ora di trabao pa comunidad of 100 dia sera. Tambe 1 aña di prison condicional cu 3 aña di prueba.
