Un bes mas e organiacion SMAC ta den noticia.  E biaha aki ta debi na e noticia di varios grupo musical cu a anuncia nan retiro for di festival di Tumba 2024 manera: Buleria, D’licious, Shine Music, Robert Jeandor y Solo Banda como tambe OAK.

E Carnaval na Aruba e aña aki ta presenta su mes como un celebracion di 70 aña, pero no ta liber di polemica. Manera un tradicion, e Festival di Tumba ta den controversia atrobe, e biaha aki ta pa falta di esfuerso di SMAC pa organisa un evento di caliber. 

E keho principal di e musiconan y tumberonan ta relaciona cu e promocion insufisiente y falta di informacion tocante e festival. Aunke ta spera cu e aña aki lo tabata special, pasobra ta Carnaval 70, e preparacionnan tabatin nan problemanan.
SMAC NO TIN COMUNICACION

E musiconan a expresa nan precupacion tocante e falta di comunicasion efectivo cu SMAC for di maart di 2023. A destaca un reunion na november di 2023 unda a discuti puntonan critico pa mehora e festival, pero te awe, no a ricibi confirmacion oficial di nada.

FALTA DI PROMOCION

E falta di promocion tambe ta un punto critico. E inscripcion na Balashi Beer Garden a wordo promovi solamente un dia di promer, y e musiconan ta considera cu no a hasi sufisiente pa hasi e festival atractivo.

E inscripcion a resulta den solamente 6 banda y 9 kantante, cual ta laga e festival refleha como pober y mediocre. 
E situacion a yega na un punto critico ora cu varios banda a anuncia durante un conferensia di prensa cu nan no lo partisipa den e festival di Tumba e aña aki. Nicole Martina, na nomber di e banda Buleria, D’Licious, Suona, Shine Music y OAK, a entrega un carta expresando nan desicion.
E carta ta accentua dos motibo principal: falta di informacion y comunicacion  efectivo, y e promocion defisiente di e evento. E musiconan ta bisa cu e reunionnan programa pa discuti aspectonan critico no a tuma lugar manera planea, y e falta di claridad riba e premionan y creacion di un categoria nobo di Tumba Loco.
Na e conferensia di prensa, a expresa e precupacion cu e evento, plania pa 20 di januari 2024, tabata den falta di tempo pa un promocion adecua.

Tambe a menciona e nesesidad di un organisacion dedica y cu experencia pa garantisa exito di e evento.
E polemica a condusi na retiro di varios banda y cantante,  den nan varios ex rey di tumba, lagando e futuro di Festival di Tumba 2024 den situacion di crisis. E carta manda na SMAC ta conclui, expresando e speransa cu e Festival di Tumba por wordo eleva y wordo produci pa un organisacion dedica den futuro, enfocando riba Carnaval di e aña siguiente. 
E destino di Festival di Tumba 2024 ta keda insigur, y e comunidad ta keda pendiente di e desaroyonan futuronan relaciona cu e celebracion musical aki.

LEAVE A REPLY

Please enter your comment!
Please enter your name here