Tur cos lo sali na cla pasobra e binida di Cristo Hesus ta cerca

Den Lucas 21:32-33 Hesus ta bisa: Di berdad Mi ta bisa boso, e generacion aki lo no pasa, prome cu tur cos tuma lugar. Cielo y tera lo pasa, ma Mi palabranan lo no pasa.

Pasobra no tin nada scondi, cu lo no wordo revela,ni nada secreto, cu lo no bira conoci y sali na cla.( Lucas 8:17).

No tin nada tapa cu lo no wordo revela,y nada scondi cu hende lo no haña sa, Pesey tur loke boso a papia den scuridad,lo wordo tendi den claridad,y loke boso a papia keto, keto den e cambernan mas paden lo wordo proclama for di dak.( Lucas 12:2-3).

Ta rond mundo tin cosnan ta sosode cu ta demostra cu e binida di nos Señor Cristo Hesus, y esaki si ningun hende por sconde pe pasobra e palabra di Dios ta bisa:

Ami ta un Dios cu ta serca Señor ta declara, y no un Dios cu ta leu tambe? 

Un hende por sconde den lugarnan secreto, asina cu mi no por mire?Señor ta declara.

No ta Ami ta yena cielo y tera? Señor ta declara.( Jeremias 23:23-24)

No tin ningun caminda na mundo cu hende por sconde pa Dios,pasobra ta Dios a crea tur cos y Dios su tempo di husticia ta yegando, pesey ta para scirbi den Romanonan 2:5 : Pa motibo di bo capricho y bo curason cu no kier arepenti, bo ta montona furia di Dios pa bo mes den e e dia di furia y revelacion di e huicio husto di Dios. Kende lo paga cada ken segun su obranan.

Dia pa dia desasternan natural ta birando mas fuerte, e calor riba mundo ta aumenta, y no tin ningun poder riba mundo cu por para e calor riba e mundo aki, solamente e misericordia di Dios. Tur esnan cu ta kere den poder di placa a cuminsa ripara cu placa no por haci nada contra locual Dios a bisa.

No tin presupuesto, pa cubri locual ta na caminda pa e mundo aki, pasobra prome cu hende kier drecha locual naturalesa a destrui, ya caba tin otro fenomeno natural na caminda, y Dios a spierta nos, cu tur locual nos ta mira ta sosode prepara pa e binida di e yiu di Dios.

Pasobra E ta bin busca tur esnan cu ta kere den dj’E. 

Pasobra Dios mes a papia y a bisa cu e a manda su Yiu unigenito pa ken cu kere den dj’E no bay perdi ma tin bida eterna, esun cu kere lo ta salba, ma esun cu no kere lo ta condena caba, pasobra e no a kere den e Yiu unigenito di Dios.

No tin ningun criatura scondi pa Su bista, ma tur cos ta habri y bisto dilanti di wowo di esun cu nos tin di haber cune.( Hebreonan 4:13).

E wowonan di Señor ta tur caminda vigilando malo y bon.( Proverbionan 15:3)

Pasobra wowo di Señor ta move bay bin door di henter tera,pa e por sostene fuertemente esnan cu nan curason ta completamente di dj’E.( 2 Cronicanan 16:9).

Pasobra Su wowonan ta riba e caminda di hende, y E ta mira tur su pasonan. No tin scuridad , ni sombra di morto, caminda e hacidornan di inikidad por sconde.( Job 34:21-22).

Pasobra pago di pica ta morto, ma e don di gracia di Dios, ta bida eterno den Cristo Hesus nos Señor.   

(Romanonan 6:23).

Ta tempo pa arepentimento drenta den tur hogar y Famia, y tur hende acepta Cristo Hesus como Señor y Salbador.

Sinceramente, Pastor Marcel Balootje