Temor di Dios ta e principio di sabiduria, tur hende cu cumpli cu Su mandamentonan tin bon comprondemento,Su Alabansa ta permanece pa semper.
Temor di Dios no ta nifica miedo di Dios, pero ta nifica haci tur locual ta agrada Dios, especialmente pa nos no murmura ni tampoco rebeldia contra su Palabra, Mandamento, y Statutonan.
Manera ta para scirbi den Romanonan 12;2 ; Y no sea conforme e mundo aki, ma sea transforma pa medio di e renobacion di boso mente,pa boso por comproba,kico ta e bon y agradabel,y perfecto boluntad di Dios.
Y tambe Dios ta splica nos bon cla kico ta su boluntad pa nos den 1 Thesalonisensenan 4:3 bisando: pasobra esaki ta e boluntad di Dios: Boso santificacion , esta pa boso abstene boso, di inmoralidad sexual, pa cada uno di boso sa con tene su mes curpa,den santificacion y honor, no cu pasion di deseonan carnal, manera e paganonan cu no conoce Dios.
Senjor ta hiba gusto den esnan cu ta tem’E den esnan cu ta spera riba su misericordia.(Salmo 147:11).
Ta algo masha importante, y necesario, cual mester ta prioridad halto den cada cas di famia pa sinja nos yuinan e temor di Dios, pasobra si nos no guia nos yuinan for di chikito riba e caminda di Dios, nan lo lanta sin temor di Dios y nan lo acepta locual e mundo tin pa ofrece, pasobra nan tin falta di conocemento.
Y nos tur sa cu pa falta di conocemento, hopi biaha escogencia robes ta wordo tuma, pesey nos tin cu corda, cu nos ta nos deber como mayor di lanta nos yuinan den e caminda di Dios, pasobra nos ta e prome yama pa haci esey.
Pa falta di conocemento y temor di Dios, e porta di scuridad ta wordo habri den bida di un hoben, pasobra laga nos no lubida cu pica ta loer tur caminda, y pa falta di temor di Dios, hende no tin dominio riba dje.
Transgresion ta papia cu e malbado den su curason, no tin temor di Dios,dilanti di su wowo. Pasobra den su mes bista esey ta ganje,cu su inikidad, lo no wordo descubri ni odia.
E palabranan di su boca ta maldad y enganjo,e a laga di ta sabi, y di haci bon.
E a planta maldad riba su cama, e ta cohe un caminda cu no ta bon, e no ta aborese maldad.(Salmo 36:4).
E ora ey nan lo yamami,ma lo mi no contesta,nan lo buscami cu diligencia,ma nan lo no hanjami,pasobra nan tabata odia conocemento,y no a scohe pa e temor di Senjor.( Proverbionan 1:29-30).
For di temor di Dios ta depende nos crecemento spiritual y respet, tambe pa e karakter wordo forma e temor di Dios ta esencial.
Decensia y respet pa nos y pa otro ta bini di temor di Dios, cual ta sinja nos pa nos pa trata nos prohimo mescos cu nos kier pa nos prohimo trata nos.
Temor di Dios ta aleha, orguyo y arogancia for di nos bida, y ta trece nos na humildad, pa bira full dependiente di Dios, yena cu fe y confiansa sabiendo cu nos Dios ta capas pa tur cos, cu nos mester den nos bida.
E temor di Dios ta instruccion pa sabiduria, y prome cu honor ta bini humildad.( Proverbionan 15:33).
Ningun grandesa ni titulo di mundo no por compara cu e humildad cu Dios, ta exigi di nos, pa nos por sirbi Dios di henter nos curason.
E temor di Senjor ta un fuente di bida, pa evita e trampanan di morto.( Proverbionan 14:27).
Sinceramente, Pastor Marcel Balootje
