Tur hende sa, cu e hende homber a wordo crea den imagen y semehansa di Dios, dilanti di Dios ta e homber ta responsabel, pasobra e a duna autoridad na e homber pa su hogar, pesey e homber mester duna cuenta di su famia dilanti di Dios.
Dios ta stima e hende homber inmensamente, pesey for di den principio di mundo e diabel a purba di tur manera pa kita autoridad cu e homber tin, esey tabata e prome Adam crea door di propio man di Dios.
Pero despues a bini e ultimo Adam ( 1 Corintionan 15:45-49) cual ta Cristo Hesus door di Spirito Santo riba y poder di Haltisimo riba Maria,y pa medio di e sanger precioso di Cristo Hesus, a redimi nos tur for di pica, pagando un preis halto cu Su bida, pa nos tur cu kere den Cristo Hesus por wordo salba.
Pesey tur homber riba e mundo aki tin un debe cu Dios, pasobra ta dificil pa un homber biba sin Dios, pasobra tur hende homber sin distincion di rasa of color ta yama pa sirbi Dios
Dicon tur hende homber mester sirbi y imita Cristo Hesus?
Pasobra Hesus a wordo tenta den tur cos ( Hebreonan 4:15).
Hesus a ninga su propio boluntad pa haci esun di Su Tata.( Lucas 22:42).
Hesus ta siña nos pa ninga nos mes y sigi Hesus.( Mateo 16:24-25).
Hesus a mustra nos cu nos mester crece den sabiduria . ( Lucas 2;52).
E Spirito di Dios, ta testifica cu Hesus a bini den carni. ( Juan 4:2-3).
Hesus a humiya su mes na nivel di hende siendo Dios.( Filipensenan 2:5-8).
Pesey nos ta papia di e Homber Cristo Hesus ( 1 Timoteo 2:5-7).
Hesus ta identifica su mes como hende Homber bisando; Si boso ta yiu di Abraham haci e obranan di Abraham. Ma awor boso ta busca Mi pa mata,un Homber cu a bisa boso e berdad, cu mi a tende di Dios, esaki Abraham no a haci.( Juan 8:39-40).
Hesus a obedece Su Tata pa e por wordo salba for di morto ( Hebreonan 5:7-9).
Pesey nos tur como hende homber mester sigi ehempel di Hesus .( 1 Pedro 2:21-24).
Señor ta haci un yamada na hende homber: Sea alerta, para firme den fe, actua manera homber, sea fuerte. Laga tur loke boso haci wordo haci cu amor.( 1Corintionan 16:13-14).
Y no lubida: Homber ta traha den imagen y semehansa di Dios.( Genesis 1:26-27).
Homber ta cabes di cas ordena pa Dios.(Efesionan 5:22-23).
Homber ta yama ta evita di cana den caminda di pica ( Salmo 1:1-3).
Homber mester provee pa su Famia. ( 2 Timoteo 5:8).
Homber mester ta mentor di su cas. ( Efesionan 6:4).
Homber ta yama pa biba cu curashi.( Josue 1:6-9).
Homber mester haci locual Dios a bise pa haci ( Mikeas 6:8).
Un homber mester ta un ehempel pa comunidad ( 1 Timoteo 4:12).
Pero nos tin cu haci oracion, pa tur e hende hombernan rond mundo cu diabel a domina cu engaño, y asina nan a cambia e berdad di Dios pa mentira, y kier biba den dobbel personalidad, homber cu a wordo traha den imagen y semehansa di Dios, pero cu e enemigo a gaña nan cu nan ta pensa cu nan ta muher, y actua manera muher y hasta kier transforma nan curpa manera muher.
Pa Dios tene misericordia, pa nan por arepenti, confesa y alcansa e berdad, cual ta Cristo Hesus, e unico cu por salba nan alma for di perdicion.
Tur hende homber mester di Cristo Hesus den nan curason, pa semper.
Sinceramente, Pastor Marcel Balootje
