Den Filipensenan capitulo 4 :12 Apostol Pablo ta declara; Mi sa di biba humilde, y mi sa di biba den prosperidad, den cualkier y den tur circumstancia mi a sinja e secreto di ta barica yen y di pasa hamber, tanto di tin abundancia y di tin necesidad.
Mayoria di nos hubentud ta hiba un bida comfortabel, y nan no conoce necesidad ni tampoco a pasa hamber manera hobennan den otro pais.
Pero esey no ta kita cu nos como mayor mester educa nos yuinan den humildad, pa nan no ansha ora nan ta falta algo material.
Den hopi cas e palabra WARDA ta hopi dificil pa pronuncia, pasobra ningun hende kier warda, pero wardamento a scapa hopi hende di problema, y hopi biaha a scapa di morto, of libra hende for di mal relacion.
Awendia tin hopi hoben cu no kier warda riba nan mayornan y hopi biaha ta biba mas halto cu e budget di nan mayornan, y mayornan ta cay den nan manipulacion y bay fia placa, y hinca nan curpa den problema pasobra nan yiu kier un cos awor y no por warda.
Mester sinja e mucha cu ora e mester di algo e bisa locual cu e tin mester y no warda na ultimo ora pa bisa su mayor cu e tin mester, pasobra no ta tur ora e mayor tin cen pa cumpre.
Y tambe mester educa muchanan cu ora tin un necesidad den cas, e mester keda den cas y no hibe na cas di bisinja, ni tampoco comparti cu amigo of amiga di scol, pasobra despues e ta bira un redo cu por termina cu violencia.
Un mucha mester por warda riba su mayor, y no bay cana papia cu otro hende locual e tin mester, pasobra hopi lo pensa cu e mucha ta busca manera di saca for di nan, locual su mayor no por cumpra, pero tambe diabel tin hopi abusador ta cana rond , pa wak mucha den necesidad y probecha di nan.
Pablo a bisa cu e a sinja e secreto di ta barica yen, y di pasa hamber, pasobra di berdad e ta un secreto.
Ora bo ta pasa den un Desierto, bo no ta sali for di dje cu Murmuracion, pero bo ta sali for di dje cu Alabansa.
Ora e Israelitanan tabata pasa den desierto tur e murmuradornan a muri den desierto, nan no sali, pero esnan cu tabatin fe a sali y a prospera.
Den tur situacion nos mester ta contento, pasobra Dios ta permiti prueba pa nos crecemento, e necesidad no ta pa semper, pero prome cu Dios bendiciona nos e ta manda prueba di fieldad pa nos.
Ora nos ta bisa cu tur cos nos por den Cristo Kende ta dunami fortalesa , no ta algo di bisa djis pa bisa, pasobra e ta contene e secreto di dominio propio cual ta un fruta di Spirito Santo.
Ta algo grandi ora nos ta proclama cu tur cos nos por den Cristo, pasobra esey ya nifica cu nos a pasa e prueba, y nos conoce e secreto y cu nos no ta preocupa, pero ta pone tur cos den oracion y suplica cu gradicimento ( Filipensenan 4:6).
Pero un gran berdad ta cu nos mester prepara nos yuinan pa tempo di escases, pa nan no perde cabes, y bende nan mes pa material, pa nan no laga hende manipula nan pasobra nan tin mester di algo, y mas cu tur cos pa nan pone Dios na prome lugar den nan bida.
No ansha pa nada.
Sinceramente, Pastor Marcel Balootje
