Den Juan 14;13-14 Cristo Hesus mes a bisa: Y tur locual boso pidi den Mi nomber, esey lo Mi haci,pa e Tata por wordo glorifica den e Yiu. Si boso pidi algo den Mi nomber lo Mi hacie.
Esaki ta palabranan cu tur famia mester ta na haltura di dje, pa asina nan uni y haci oracion y reconoce cu no tin nada mas poderoso cu oracion.
Oracion ta exigi humildad, pasobra ora nos ta humilde nos ta laga tur cos den man di Dios, cu simpel confiansa cu Dios ta regla e asunto pa nos.
No lubida cu e palabra di Dios ta bisa nos den 2 Cronicanan 7:14 : Si mi pueblo cu ta wordo yama na Mi nomber . Humiya nan mes,y haci oracion,y busca Mi cara, y bira for di nan mal camindanan,e ora ey lo Mi tende for di cielo,y lo pordona nan pica,y cura nan tera.
Pero tambe e palabra di Dios ta recorda nos con grandi nos fe y confiansa mester ta den Dios bisando den Filipensenan 4:6-7: No preocupa pa nada, ma den tur cos, pa medio di oracion,y suplica cu gradicimento, laga boso peticion ta conoci dilanti di Dios. Y e pas di Dios, cu ta surpasa tur comprendemento, lo warda boso y boso mente den Cristo Hesus.
Ta conoci pa nos tur oracion ta duna poder pa gana gera sin haci uso di ehercito humano.(Isaias 37:14-38).
Oracion por habri matris di un muher steriel y causa cu e lo tene relacion cu su esposa y sali na estado.( 1 Samuel 1:9-20),
Oracion tin poder pa lanta morto ( Hechonan 9:39-43).
Oracion tin poder pa saca demonjo ( Hechonan 16:16-18).
Oracion tin poder pa libra hende for di prison ( Hechonan 16:25-28). ( Hechonan 12:5-7).
Oracion tin poder pa yuda den e tempo trabahoso aki y dianan dificil cu ta na caminda.(Lucas 21:32-36).
Pero tambe ta conoci cu pa falta di oracion y desobendencia na Dios hende ta cay den problema grandi y hasta rey a perde reino .( 1 Samuel 15:22-23).
E garantia cu Dios ta duna nos pa medio di oracion ningun hende no por ofrece;Mateo 7:7-8 : Pidi,y lo wordo duna na boso, busca y boso lo hanja, bati y lo wordo habri pa boso. Pasobra ken cu pidi lo ricibi y esun cu busca ta hanja, y pa esun cu bati lo wordo habri.
Marco 11:24: Pesey Mi ta bisa boso, tur loke boso pidi ora boso ta haci oracion, kere cu boso ta ricibie y e lo bira di boso.
Oracion ta comunicacion cu Dios, pesey nos mester tuma tempo den oracion, pasobra Hesus tabata haci oracion constantemente na Su Tata cu ta den cielo, hasta prome cu e drenta den su momentonan di sufrimento for di Getsemani pa Calvario E tabata comunica cu su Tata pa medio di oracion.
Pa medio di oracion, ora Daniel a wordo tira den cueba di Leon e leonnan no por a haci nada, pasobra Dios mirando,su oracion constante a manda un angel bin sera boca di e leonnan.
Nos tin cu realisa cu un bida sin oracion ta un bida bashi, un bida sin comunicacion cu Dios, cu ta hiba na un bida sin speransa, caminda duda ta domina y scuridad ta drenta.
Ta un previlegio den nos bida ora nos por haci oracion na Dios Todopoderoso, pasobra su palabra ta sinja nos den Mateo 21:22: Y tur loke boso pidi den oracion , cu fe boso lo ricibi.
Laga nos tur uni den oracion, constantemente pasobra esey ta e boluntad di Dios.
Sinceramente, Pastor Marcel Balootje
