Morto y bida ta den poder di lenga, y esnan cu stima esaki lo come su fruta.( Proverbionan 18:21).
Palabra malo, sushi, negativo, ta rebaha esun cu ta haci uso di dje, esey kiermen cu tur hende cu ta papia palabra sushi, ta rebaha nan mes, y ta mustra un gran falta di educacion.
Si bo tende un cantica cu ta yen di palabra malo , of palabra sushi of palabra negativo, no canta e cantica ey, pasobra bo ta yamando negativismo riba bo mes, y pesey cos no ta bay bon cu bo, pasobra bo ta declara malo pa bo mes.
Si bo mira un pelicula yen di palabra malo, esey ta nifica cu bo ta mirando cosnan robes, pasobra maldad ta drenta bo bida pa medio di locual cu bo ta tende of mira.
Palabra malo ta idioma di diabel, Dios no tin nada di haber cu palabra malo, palabra malo su intencion ta pa ofende, pa desvia, pa haci hende sinti su mes chikito, pa discrimina, y manipula, y nos tur sa cu Dios ta amor. Y den e cosnan asina e presencia di Dios no ta.
Pesey palabra di Dios ta bisaโ
Efesionan 4:29: No laga ningun palabra danjino sali for di boso boca,sino solamente palabra cu ta bon pa edificacion, conforme e necesidad di e momento, pa esaki por duna gracia na esnan cu ta tende.
Efesionan 5:3-4: Ma no laga inmoralidad of cualkier sorto di impuresa of golosidad of cualkier sorto di impuresa of golosidad, no wordo menta mes meymey di boso,manera ta pas pa e santonan, ni sushedad,ni papia mento di coy loco,ni chansanan bulgar,cu no ta pas,mamas bien duna gradicimento.
Colosensenan 3:8-9; Ma awor boso tambe mester pone tur esakinan un banda,rabia, furia malisia calumnia,y palabra sushi for di boso boca,No ganja otro como cu boso a pone un banda e hende bieu cu su practicanan malbado.
Galationan 6:7: No ganja boso mes, Dios no ta laga haci bofon di djโE, pasobra loke un hende sembra esaki tambe e lo cosecha.
Tin hopi hende ta kere cu nan autoridad ta sinta den palabra malo, cu ora un mayor mester coregi un yiu, e mester usa un palabra malo pa asina e yiu tende, awel a yega e ora pa sali for di e creencia y cultura ey, pasobra palabra malo ta herida hende, y ta lanta rabia y odio cu un dia lo explota.
Laga nos ta serio y decente den nos comunicacion cu tur hende pasobra e palabra di Dios ta bisa:
Colosensenan 4:5-6 Comporta boso cu sabiduria pa esnan cu ta pafo, haciendo bon uso di e oportunidad. Laga boso palabra ta semper cu gracia, sasona cu salu,pa boso por sa con boso mester contesta cada persona.
No laga palabra malo, sushi, negativo, ta wordo papia den bo hogar, pasobra si abo ta di Cristo , bo cas tambe ta di Cristo Hesus, palabra malo ta aleha presencia di Spirito Santo, y ta kibra e harmonia di respet y amor cu mester wordo matene bibo den bo cas, no envolvi palabra malo den nada cu bo ta haci.
Palabra malo ta haci nos lipnan impuro, ta demostra falta di educacion, y falta di temor pa Dios, y tambe falta di respet pa nos prohimo, palabra malo no tin ningun balor agrega den nos bida.Papiando palabra malo nos no ta crece, pasobra palabra malo ta bobedad.
Un lenga suave ta un palo di bida, ma perversidad den dje ta kibra e spirito.( Proverbionan 15:4).
Warda bo lenga di maldad y bo lepnan di papia enganjo.( Salmo 34:13).
Sinceramente . Pastor Marcel Balootje
