Den careda di 12’or y mey alarma a wordo bati, pa un accidente serio, un Quadracer a accidenta na e boca Indjeco conoci como Blackstone Beach y informacion addicional tabata bisa cu un di e personanan a keda gravemente herida y lo tabata ricibiendo CPR. pero lamentabelmente un rato despues e vcitima no tabata duna señal di bida mas.
E dama cu a fayece a bin cu un grupo di hende muher pa asina celebra dia di Mama na Aruba y awe nan tabata riba un tour di Quadracer. Durante e tour, riba e caminda na altura di Blackstone Beach nan a wordo sorpresa pa un buraco di algun meter hundo, e dama cu tabata na stuur di e Quadracer a logra bula for di e quadracer na tempo, pero lamentabelmente esun sinta patras riba e quadracer no a por a bula for di quadracer na tempo y a bay cay cu e quadracer den e buraco aki. E victima a haya hopi golpi na pecho.
Hopi lihe a logra saca e victima for di e buraco, cu tabata basta hundo pero e quadracer si a keda atras den e buraco, mirando cu ta hopi dificil pa sak ‘e for di e buraco hundo aki.
Na e sitio tabata presente e paramediconan di ambulance, personal di brandweer, agentenan policial di departamento tecnico y di departamento di trafico. Slachtofferhulp tambe tabata na e sitio pa asisti e amiganan di e fayecido.
E curpa sin bida a wordo transporta den baki di e pickup di brandweeer, for di e sitio di e accidente cu tabata te na rand di e costa te na Sabanilla Abou, caminda e auto di e Funeral Home encarga lo por yega pa busca e curpa.. E victima tabata tin 36 aña y tabata biba na Merca.
