Diabierna anochi, Caya Grandi a bira e epicentro di alegria, union familiar y bida cultural durante e prome edicion di Ban Bek Caya, un evento cu a surpasa tur expectativa y a lansa un sentimento di speransa y renobacion pa nos caya principal.
Un multitud grandi di hende, tanto local como turista, a yega pa disfruta di un anochi yena di alegria, cultura, entretenimento y compras na prijsnan special. Caya Grandi a haya bida manera den su tempo di gloria, cu famianan disfrutando, gosando y compartiendo momentonan hunto.
E ambiente tabata vibrante, tiendanan tabata yen, ambiente tabata reina den cada skina, y bendedornan y comerciantenan den caya a logra un anochi comercial exitoso despues di hopi tempo. Tabatin un aire fresco den Caya Grandi y comercio local a haña un empuhe nobo, y nos comunidad a mustra cu caya principal tin derecho di existencia.
Ban Bek Caya no solamente a trece bida bek den un area comercial importante, pero tambe a uni hende riba un manera positivo y inspirado. E evento a demostra cu si traha hunto, por logra cosnan grandi.
Cu hopi orguyo, Gobierno di Aruba por bisa cu e prome edicion di Ban Bek Caya tabata un exito rotundo, y ta ansioso pa e proximo edicion.
