E compania di aviacion estatal Aerolineas Argentinas a presenta diabierna e avion cu lo transporta e seleccion Argentino di futbol p’a ‘e Copa Mundial 2026. E aparato tin un diseño special cu ta incorpora e jersey number 10 di e capitan y strea di e ekipo, Lionel Messi.
E avion, presenta den e hangar 5 di e aeropuerto internacional di Ezeiza, ta wordo considera p’a ‘e compania como e “avion mas Argentino di mundo”. E aeronave a wordo prepara cu un diseño conmemorativo special inspira den e seleccion di futbol y den su capitan, mirando e preparacionnan pa e Copa Mundial di FIFA 2026.
E parti di patras (e rabo) di e avion tin un intervencion cu ta inclui e number 10 y e diseño oficial di e jersey Argentino desaroya pa e marca Adidas. Segun Aerolineas Argentinas a splica den un comunicado, e diseño aki ta “un representacion simbolico di e liderazgo y e conduccion di e ekipo dentro di e campo di ateriahe, asocia cu e timon cu ta guia e rumbo di e aeronave”.
E diseño ta inclui tambe e banner di capitan asina aplica riba e motornan, hunto cu e tres streanan cu ta rindi homenahe na e titulonan mundial cu Argentina a gana, di cual e ultimo tabata na Qatar 2022.
“E ta un avion puramente Argentino, dunando hopi importancia na e number 10. Nos ta hopi orguyoso como empresa di por a realiza e trabou aki y di por transporta e seleccion argentino pa trece e di cuater Copa di Mundo cas,” Pablo Da Grava, hefe di turno di e area di mantencion di hangar 5 di e aerolinea, a declara na e agencia EFE.
E trabou di diseño riba e avion a wordo realiza durante cuater dia den e tayernan di Aerolineas Argentinas.
Durante e mundial, e compania lo conta cu vuelonan special pa Kansas City y Dallas, ciudadnan na Merca caminda Argentina lo hunga su partidonan corespondiente na e fase di grupo di e torneo. Asina mes, e aerolinea lo reforsa su operacion pa Miami cu vuelonan diario desde Buenos Aires, incluyendo frecuencianan di dia y di anochi.
E compania a anticipa cu e ‘avion mas Argentino di mundo’ lo wordo uza despues riba e rutanan internacional di e empresa, hundo cu e colornan Argentino y e spirito mundialista pa diferente destino na America y Europa.
