Pa 55 aña, Jeugdgezondheidszorg (JGZ) di Directie Volksgezondheid (DVG) ta vacuna muchanan na scol. E esfuerso continuo aki a contribui na un cobertura halto di vacunacion durante hopi aña y asina elimina propagacion di diferente malesa infeccioso bou nos muchanan.
Ora mayoria di muchanan ta bon vacuna, malesanan manera sarampi, cacheton, polio, tetanus y otro tin menos oportunidad pa plama. Un cobertura halto di vacunacion ta importante no solamente pa e mucha cu ta vacuna, sino tambe pa demas baby, persona cu tin un sistema inmunologico debil y otro personanan den comunidad cu pa motibo medico, no por ricibi cierto vacuna.
Si cada bez menos mucha ta ricibi nan vacuna, malesanan cu actualmente casi no ta circula na Aruba por haya oportunidad pa bolbe plama, especialmente pasobra biahe internacional ta conecta Aruba cu paisnan unda ainda tin brote activo di diferente malesa cu nos no ta mira pa hopi tempo.
P’esey DVG ta pidi mayornan pa controla nan yiu su carchi di vacunacion, entrega e formulario di permiso na tempo y presenta prueba di vacunacion si en caso e mucha a nace of a wordo vacuna pafor di Aruba. JGZ lo verifica si e mucha ta bon vacuna segun su edad y e skema vigente na Aruba.
Proteccion di comunidad ta cuminsa cu proteccion di cada mucha.
Pa mas informacion, tuma contacto cu seccion JGZ na 522-4200.
Hunto nos ta mantene nos muchanan, scolnan y comunidad proteha contra malesanan infeccioso.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw
