Tur luna Horacio Oduber Hospital (HOH) su enfoke ta pa elogia coleganan cu di un forma of otro ta destaca y ta bay e “extra mile”. Pa luna di september a scoge como empleado di luna Lawrence Henriquez cu ta traha na departamento di Medisch Administratie.  Manera semper servicial y colegial, Lawrence no a duda y a yuda su colega ora a yame pa trece un buki pe unda nan ta “hayando les”. Un surprise emocional ora ela ripara cu no ta les su coleganan a bay pero sino un celebracion specialmente pe. E no a spera na ningun momento di mira su famia, coleganan di otro departamento y Hunta di Directiva presente y a keda masha contento ora di tende cu ela wordo scogi como empleado di luna.

Segun Emile Thiel, colega di Lawrence, tabata un reto pa organisa e sorpresa aki pasobra Lawrence ta un persona cu ta observa tur cos. Despues di a hinca ful e evento den otro, a traha un groupchat, haci afspraak, unda cu cada un colega a trece snacks y decoracion p’asina organisa e celebracion sorpresa aki. 

Lawrence Henriquez ta traha actualmente na Medisch Administratie cu tin un rol masha importante na HOH. Nan ta maneha e dato y informacion di tur pashent, incluyendo nan testnan, pues nan historia medico. Dokternan local y internacional regularmente ta den contacto cu e departamento aki pa por haya acceso na informacion di pashent y pues pa por yega na un bon diagnostico medico. E intercambio di informacion semper ta bay na un manera safe y segun proceduranan masha estricto y conforme ley y protocolnan stipula.

Como colega Lawrence ta hopi amabel, colegial y servicial. Un tremendo team player. Semper e ta pendiente di su coleganan, no solamente di su departamento pero tambe di henter e organisacion. 

Semper su trabao ta netjes y detaya. E ta ricibi hopi compliment, no solamente di local pero tambe di turista. Un ehempel di Lawrence su dedicacion ta cu e la bolbe trabou bek un diabierna atardi pa asina regla toch pa un pashent haya su documentonan prome cu e bay afo, pues e ta bay semper “the extra mile”. E pashent a keda feliz y a manda por ecrito su compliment pa colega Lawrence su servicio! 

Lawrence ta activo den mehora servicio y calidad y ta ehecuta medida pa optimalisa e procesonan. Nan ta procesa miles di dossier di pashent pa aña y nan mester wordo bon warda pa asina por haya bek facilmente. Ademas, Lawrence ta prepara e trabou pa e ‘medical coders’. 

Hospital ta masha orguyoso di su empleadonan y ta un di e poco dunadonan di trabou cu tur luna ta anuncia un empleado di luna pa mantene su empleadonan contento, uni, motiva y cu un gana enorme pa sigui nan pasion den nan trabou na Hospital. Lawrence a demostra su balor pe organisacion, y merecidamente ta sali empleado di luna september 2022! Masha pabien!

LEAVE A REPLY

Please enter your comment!
Please enter your name here