Consenshi limpi ta agrada Dios, y ta haci nos comunicacion cu Dios mas intimo, pasobra den un consenshi limpi Dios ta expresa su boluntad y su santidad.
Pesey Dios ta demanda santidad di nos, pasobra consenshi limpi y santidad, ta libra nos for di tur inmoralidad, maldad y malicia.
Caminda tin orguyo, y inmoralidad, no tin consenshi limpi, ora nos bay di acuerdo cu inmoralidad, of rechasa e boluntad y principionan di Dios pa complace cu hende, ta un muestra cu nos consenshi no ta limpi y cu pica a corumpi y ta domina nos bida.
Pasobra consenshi limpi ta pone hende balora e boluntad di Dios pa nan bida, por ehempel si bo ta bon na altura cu un hende ta haci algo robes totalmente contra boluntad di Dios, y bo ta keda keto of consenti, esey ta nifica cu bo ta un mal amigo, un mal lider, un mal esposo of esposa, pasobra bo no ta balora e boluntad di Dios den bida di bo prohimo.
Consenshi limpi ta duna honor y gloria na Dios tur momento. Pesey e palabra di Dios den Marco 11:25: Y ki ora cu boso ta para ta haci oracion, pordona si boso tin algo contra un hende, pa boso Tata cu ta den cielo tambe pordona boso, boso transgreshonnan.
Pordon ta hiba nos na un consenshi limpi,caminda nos no ta cana cu hende riba nos curason.
Un matrimonio no por funciona bon, si e pareha su consenshi no ta limpi contra otro, pasobra caminda tin duda y desconfiansa tin pica.
Consenshi limpi ta esencial pa nos oracion.
Consenshi limpi ta esencial pa nos salud mental , pasobra e ta evita mal pensamento , stress y depresion.
Consenshi limpi ta necesario pa nos amistad, nos actitud, nos karakter y nos integridad.
Caminda tin consenshi limpi tin pordon, y kehamento, murmuracion y rebeldia ta keda atras.
Nos consenshi ta e bentana di nos spirito caminda Dios ta expresa Su santidad y Su boluntad.
Y mantene un bon consenshi, asina cu si acaso boso wordo calumnia, esnan cu falsamente ta acusa boso bon conducta den Cristo por keda na berguensa.( 1 Pedro 3:16).
Ta imposibel tin un bon consenshi, ora nos ta planea maldad contra nos prohimo, ora nos ta gaña otro , ora nos ta aproba maldad, y nos ta tuma e berdad di Dios cambie pa un mentira y no ta haña ta necesario pa reconoce Dios.( Romanonan 1:28-32).
Caminda tin bon consenshi den matrimonio , adulterio no ta haña lugar pa drenta, pasobra bon consenshi ta siña hende cana den e lus di Dios.
Pasobra si nos ta bisa nos tin comunion cun’E y sinembargo nos ta cana den scuridad, nos ta gaña y no ta practica e berdad.
Ma si nos ta cana den lus mescos cu E mes ta den lus, nos tin comunion cu otro, y e sanger di Hesus Su yiu, ta limpia nos di tur pica.( 1 Juan 1;6-7).
Confesion ta hiba nos na un consenshi limpi, pasobra nos ta arepenti y den scondemento di pica , e consenshi ta permanece sushi, y e enemigo ta sigi tuma ventaha te na e momento cu confesion tuma lugar.
Den salmo capitulo 25 David ta confesa;.
Salmo 25:7 : No corda e picanan di mi hubentud, ni mi trangreshonnan, conforme bo misericordia corda riba mi.
Salmo 25:11: Pa motibo di Bo nomber O Señor pordona mi inikidad pasobra esey ta grandi.
Salmo 25:21:Laga integridad y rectitud wardami pasobra mi ta spera riba bo.
Confesion ta yuda nos mantene un consenshi limpi.
Sinceramente Pastor Marcel Balootje.
