Sinceridad ta enemigo di tur mentira, sinceridad ta demostra respet y balor, sinceridad ta demostra temor di Dios, y temor di Dios ta principio di sabiduria,sinceridad cu Dios, ta hiba hende na crecemento, sinceridad ta aumenta confiansa den Dios, sinceridad ta haci nos disipelnan di Cristo Hesus, pasobra hende sincero ta stima, ta duna amor, manera Cristo Hesus a duna amor, pa asina trece pas y trankilidad den curason di nan prohimo, no ta importa e situacion cu nan por ta den.
Ora un dokter ta sincero e pashent ta contento, y ta bira bon lihe, pasobra e wordo confronta cu e berdad, awel asina ta nos Dios, nos Dios ta sincero, y si nos confesa nos pica E ta fiel y husto pa pordona, y libra nos di tur inhusticia ( 1 Juan1:9).
Sinceridad, Honestidad y Berdad,ta e formula pa tur bon relacion y bon amistad.
Laga nos hala serca cu un curason sincero,yen di siguransa di fe,cu nos curasonnan purifica di un mal consenshi,y nos curpanan laba cu awa puro. Laga nos tene firme na e confesion,di nos speransa sin vasila.Pasobra Esun cu a priminti ta fiel.Y laga nos considera con pa stima otro pa stima y haci bon obra.( Hebreonan 10:22-24).
Hende sincero ta stima di berdad,
Hende sincero ta pordona di curason,
Hende sincero no ta trece cosnan bieu di otro dilanti cada rato, pasobra sinceridad ta cura herida, una bes nos pordona , nos no ta bini bek riba cosnan cu a pasa , pasobra sinceridad ta biba den boca y curason.
Ora nos ta sincero nos ta honra Dios. Cu nos sinceridad nos ta demostra cu nos no ta lubida con Cristo Hesus a hustifica nos pa medio di Su sanger cu e a derama pa nos pa pordon di nos picanan.
Nos mester keda sincero cu otro den tur tempo, keda papia berdad sin bira rond, bisa e cos manera e ta pasobra berdad ta haci hende liber, pero trosemento di palabra ta hiba hende na confusion y scuridad.
Laga nos amor ta sin hipocrecia,Aborece loke ta malo, tene firme na loke ta bon.
Tur hende por haci un fout, pero no mester ta asina cu nos ta considera pica como un fout, pasobra pica, ta pica, y e mester reconoce , confesa y arepenti, pa asina hende por sali for di dje.
Sinceridad ta pone luz den nos bida, mentira, arogancia, orguyo y capricho ta hiba hende scuridad y ta lanta furia di Dios riba bida di hende.
Hesus den su inmenso amor ta demostra kico lo pasa cu hende cu no ta pordona cu un curason sincero y no ta tene misericordia di otro den Mateo 18:32-35 bisando; Asina,tambe Mi Tata celestial lo haci cu boso, si cada un di boso no pordona su ruman di henter su curason.
Ta den sinceridad nos amor ta wordo purba, ta den sinceridad nos ta stima otro, ta cu tur sinceridad nos ta sinja balora otro, y respeta otro.
Pesey anto, teme Senjor y sribi’E cu tur sinceridad,y den berdad. ( Josue 24:14).
Un hende cu ta envolvi den idolatria , no ta stima Dios cu un curason sincero, pasobra ta para scirbi, cu nos lo stima Dios, cu henter nos alma, mente, curpa, curason, nos prohimo ,manera nos mes.
Sinceridad ta pone nos reconoce cu nos curpa ta tempel di Dios, y cu e Spirito di Dios ta biba den nos y cu nos no por ofrece miembranan di nos curpa na inmoralidad.
Sinceridad ta hiba nos na decensia, y pone nos cana firme den Senjor.
Sinceramente, Pastor Marcel Balootje
