Tur cos ta permiti pa mi , ma tur cos no ta cumbini,tur cos ta permiti pa mi,ma lo mi no laga nan domina mi.( 1 Corintionan 6:12).
Den e dianan di fiesta aki ta facil pa cay den gara di paranda, fiesta, buracheria, ya cu hopi hende kier ta alegre, locual no tin nada malo aden pero tin un cos nos no por lubida:
Of boso no sa cu boso curpa ta e tempel di Spirito Santo, kende ta den boso. Kende boso tin tin di Dios, y cu boso no ta pertenece na Dios, y cu boso no ta pertenece na boso mes.Pasobra boso a wordo cumpra cu un preis pesey glorifica Dios den boso curpa. ( 1 Corintionan 6:19-20)
Ora nos ta neglisha, of lubida, of rebeldia contra e palabra di Dios, semper e lo tin consecuencia pa nos, e palabra di Dios ta un palabra di prevencion pa evita lamento y decepcion.
Aunke pa hopi e por zona straño pero di berdad nos curpa no ta di nos mes e ta di Dios, y Dios tin tur derecho riba nos pasobra e a forma nos den barica di nos mama, y pa medio di su Yiu Cristo Hesus e a redimi nos for pica, rancando nos for di man di diabel.
Cristo Hesus a saca nos for di scuridad y trece nos na Su lus, pesey ta masha doloroso ora nos bay bek na locual, nos a wordo libera di dje.
No ta desconoci cu tin hende cu conociendo Dios, keto bay ta luchando contra adiccion, pasobra nan ta permiti adiccion domina nan bida, y ta lubida cu e poder y autoridad den nan bida ta Crsito Hesus tin e . Pasobra locual un hende permiti goberna su mente,ta locual ta goberna su bida.
Boso no sa cu boso ta tempel di Dios,y cu e Spirito di Dios ta biba den boso. Si un hende destrui e tempel di Dios, Dios lo destrui’e. Pasobra e tempel di Dios ta santo, y esey ta loke boso ta.
Un hende tin dos pia pero e no por cana den dos caminda, ta imposibel sirbi dos Dios, y cana den dos caminda, pasobra lus cu scuridad no por uni.Ora un hende bandona caminda di Dios y bay bek den caminda di mundo semper e lo haña sota, pasobra e enmigo lo atake cu dobbel forsa. Pasobra su tempel ta limpi y e enemigo lo haci tur cos pa domina su bida.
Boso no sa cu boso curpa ta miembro di Cristo?.( 1 Corintionan 6:15). Nos tin cu siña balora locual Dios a duna nos, y no haci cos riba nos mes y pone cara di Dios y nos mes cara na berguensa.
Lampi di e curpa ta e wowo, asina ta cu si boso wowo ta bon, henter bo curpa lo ta yen di lus.Ma si boso wowo ta malo, henter bo curpa lo ta yen di scuridad. Asina ta si e lus cu ta den bo ta scuridad, ki grandi e scuridad ey ta.( Mateo 6:22-23).
Boso ta di Dios, yiu chikitonan,y boso a vence nan, pasobra mas grandi ta esun cu ta den boso , cu esun cu ta den mundo.
Nos tin di corda cu ningun hende no por haci nada scondi cu Dios no ta mira, bo por sconde pa hende, pero ningun hende por sconde pa Dios.
Pesey e momento di stop di gaña nos mes a yega, arepenti y berdaderamente busca santidad, pasobra esey ta e boluntad di Dios pa nos bida.
Dios ta semper fiel y misericordioso.
Sinceramente Pastor Marcel Balootje
