Esta cu Dios den Cristo tabata reconciliando e mundo cu Su mes, sin tuma nan picanan na cuenta, y E a encarga nos cu e palabranan di reconciliacion.
Pesey nos ta embahadornan pa Cristo, como sifuera Dios tabata spierta door di nos, nos ta roga boso , sea reconcilia cu Dios.
E a haci Esun, Kende no conoce pica, bira pica pa nos, pa nos por bira husticia di Dios den den dje.( 2 Corintionan 5:20-21).
Un embahador ta representante di un reino, un pais, ta un posicion previlegia, y e tey pa trece pas, pa reconciliacion, pa evita guera, pa papia e berdad, ta pesey nos ta yama .
Nos deber ta pa trece berdad y pas di Dios , tur caminda cu nos ta y tur caminda cu nos bay,
Nos deber ta pa reconcilia hende cu Dios, pa drecha e relacion kibra, cu amor, cu misericordia, semper mustrando riba e caminda di berdad y bida cual ta Cristo Hesus.
Pasobra no ta cumbini ningun hende pa biba cu enemistad cu Dios, y biba den inmoralidad y malicia, pesey Dios ta duna oportunidad igual na tur hende pa reconcilia cu Dios.( Juan 3:16-19).
Reconciliacion ta nifica cura un herida, y un herida mester wordo cura cu e berdad, e mester wordo haci limpi, pasobra si e wordo sera cu sushi aden e ta causa infeccion, y mester wordo habri di nobo, pa e wordo haci limpi pa asina e cura bon.
Pa causa di pica nos tur a wordo herida, y keto bay e enemigo kier aumenta nos heridanan cu inmoralidad y inhusticia, pero nos Dios , no a para keto, e no fiha Su bista riba nos picanan, pero e a manda su Yiu unigenito, pa muri na crus pa nos, pa asina nos por ricibi pordon di pica y bida eterna den Cristo Hesus.
Ta tur hende mester wordo reconcilia cu Dios, pasobra nos tur haci pica, no tin ningun hende cu no a haci pica y esey nos tin di reconoce.
Palabra di Dios ta bisa: Si nos bisa nos tin comunion cun’E y sinembargo nos ta cana den scuridad,nos ta ganja, y no ta practica e berdad. Ma si nos ta cana den lus, mescos cu E mes ta den lus, nos tin comunion cu otro, y e sanger di Hesus, Su Yiu ta limpia nos di tur pica.( 1 Juan 1 :6-7).
Si nos bisa cu nos no tin pica, nos ta ganja nos mes, y e berdad no ta den nos.
Si nos confesa nos picanan, E ta fiel y husto pa pordona nos, nos picanan , y pa limpia nos di tur inhusticia.
Si nos bisa cu nos no a haci pica, nos ta haci E un ganjado y Su palabra no ta den nos.( 1 Juan 1:8-10)
Aki nan nos tur por mira con necesario e reconciliacion cu Dios ta den nos bida,pasobra no tin otro opcion, no tin otro salidad, e manera cu e mundo ta bayendo, no a keda hende nada mas cu entrega nan bida na Cristo Hesus.
Den 2 Corintionan 5:19 e ta para cla scirbi, cu pa medio di Cristo Hesus nos ta alcansa reconciliacion cu Dios, esey ta nifica cu no tin di mester di bay busca un formula nobo,pa algo cu a existi caba.
Di otro banda ora nos ta embahador pa Cristo nos tin di para pa e Berdad, pasobra tur esnan cu bay prome cu nos a para pa e Berdad cu nan bida, pasobra ningun embahador pa Cristo por ta un cobarde.
Sinceramente, Pastor Marcel Balootje
