Oranjestad – Departamento di Cultura Aruba (DCA) bou di auspicio di Ministerio di Cultura Aruba a tene un encuentro ameno di Fiesta di San Juan, dera gay na John F. Kennedy Education Center. Empleadonan di DCA y di Departamento di Enseñansa Aruba a topa otro den un ambiente di Celebracion di San Juan.

Minister di Cultura Aruba Sra. mr Xiomara Maduro a bishita e encuentro aki y a haci entrega di un reconocemento y homenahe na Sra. Ray-Anne Hernandez, presidente di Centro di Bario Tanki Leendert pa nan contribucion na e celebracion di San Juan, dera gay y su persona cu na un edad jong ta contribui na nos cultura durante hopi aña caba.

Riba ambiente musical di e agrupacion musical di DCA a crea un encuentro ameno relaciona cu Celebracion di San Juan dera gay. Tambe sr. Cornelio Croes a conta su experiencia di su 20 aña caba organizando actividad di Celebracion di San Juan, dera gay. Asina’ki a duna un chispa di e celebracion aki y tur esnan presente a pasa un rato yen di ambiente.

Departamento di Cultura Aruba ta sigui cu su contribucion na e Celebracion di San Juan y su proyecto escolar pa nos scolnan tanto preparatorio y basico.

Biba nos Cultura, Biba San Juan y tin un Bon San Juan!

LEAVE A REPLY

Please enter your comment!
Please enter your name here