Temporada di fin di aña, di pas y amor, comprension y hermandad. Diabierna anochi en conexion cu e temporada di Pasco, Prome Minister di Aruba mr. Mike Eman acompaña pa Minister di Turismo mr. Wendrick Cicilia a haci e acto oficial di cendemento di luz na Plaza Daniel Leo como tambe den Caya Grandi.
“Den e prome paseo den Caya Grandi, yena di iluminacion festivo, ta refleha e caminda cu pais Aruba ta riba dje, un caminda di yena speransa atrobe”, ta locual Premier Eman a expresa.
Di su banda Minister Cicilia tambe a comparti su sentimento di mira Caya Grandi ilumina, cu ta simbolisa e vision cu Gabinete AVP-Futuro tin pa pais Aruba, pa Caya Grandi, na momento cu a cuminsa ehecuta diferente proyecto manera Ban Bek Caya cu ta refleha e speransa bibo, trece luz bek den Caya cu enfoke pa trece bienestar na e comunidad, pa goberna na beneficio general di pais, di pueblo pa pueblo.
“Un gobierno di Luz”, ta locual cu Minister Cicilia a indica.
Lo surpasa tempo dificil
E pueblo ta expresa su alegria y ta mira e optimismo nobo cu tin na Aruba. Comunidad a mira atras, despues di un periodo di ocho aña di tempo hopi dificil den cual hopi cos a bay atras, perdida di poder di compra, barionan y centronan di cuidad pero awe comunidad por mira cu tin un gobierno cu tin atencion na e comunidad, for di mucha te na hende grandi.
Pensionadonan lo mira cambio un biaha mas
Algo cu sigur e gobierno aki a cumpli cu ne manera a drenta, ta cu e pensionadonan. Nan a haya un aumento di awg.250,= cu a brinda un alivio grandi den nan entrada. Presupuesto 2026 ta den preparacion y aki ta caminda ta bay mira un suma di aumento un biaha mas pa nos grandinan. Ademas di esaki a hiba combersacion cu director di SVB pa asina delibera riba un reduccion di e prima di AZV pa nos grandinan locual lo trece un alivio sigur pa nos adultonan mayor.
Pakete di remedi ta practicamente completo
Un logro cu ta di gran satisfaccion ta di mira e lista di remedi casi den su totalidad bek cubri. Conhuntamente cu Minister di Salubridad Mervin Wyatt-Ras a logra esaki, como tambe e ayudo di aumento di bijstand cu a yega pa brinda un sosten grandi na hopi mayor cu tabatin mester di esaki na comienso di aña escolar.
Renobacion di e barionan
Algo cu hopi a tuma nota di dje caba ta e esfuerso grandi tumando luga pa restaura/renoba e barionan rond nos isla. Proyectonan cu ta bay inicia y algun cu a inicia caba manera entre otro Mabon, De Vuyst, Bushiri como tambe inuaguracion di scol di musica den Semeleerstraat na Noord, pero cu e vision di habri un den cada districto.
Baki permanente pa alivia e problematica di desperdicio
Un esfuerso extenso y den colaboracion cu diferente departamento y instancia a duna resultado sumamente exitoso den limpiesa di nos pais. E proyecto di Baki den Bario a brinda e comunidad e oportunidad na uni den e compromiso pa mira nos isla limpi bek y e comunidad a respalda esaki grandemente. Mientrastanto a delibera pa yega na un solucion permanente pa e problematica di desperdicio, caminda conhuntamente cu Ministerio di Turismo y ATA, bou liderzgo di Minister Cicilia, a logra aloca seis localidad fiho cu baki pa desperdicio y asina brinda e comunidad un solucion mas structura pa deshaci di sushedad.
Den un tempo corto por a mira logronan grandi tumando luga riba nos isla. Nan no ta solamente regalo na e comunidad, pero mas bien nan a keda priva di nan cual nan tabatin derecho riba dje den e ultimo ocho añanan. Awe e pueblo tin e beneficio di un bon gobierno, cu logronan impresionante, den apenas shete luna di gobernacion.
E ta un momento di transicion grandi den nos comunidad, no solamente un cambio di gobernacion pero tambe un cambio di pensamento, caminda e pueblo ta bin na prome luga, e bon comun na prome luga y cu e sentido di compromiso aki ta traha tur dia den Gabinete AVP-Futuro como tambe den e fraccionnan den Parlamento.
Un era nobo pa San Nicolas
Prioridad nobo pa e refineria tabata decisivo y pa Minister President di Hulanda e tabata admirabel e decision ey. Pa e area di San Nicolas esaki nifica un era nobo. Ademas di esaki a indica e iniciativa di promove San Nicolas grandemente y a concretisa e realisacion di mira Carubbean un biaha mas bira un realidad pa San Nicolas.
MFA San Nicolas pronto un realidad
Algun dia atras, Prome Minister Eman a anuncia cu MFA San Nicolas pronto lo bira un realidad. Na december lo saca e destaho publico pa duna inicio na e trabaonan pa e MFA na San Nicolas. Finalisacion riba e diseño ta tumando luga pa asina despues keda entrega na DOW. Na comienso di otro aña ta mira construccion ta inicia y asina por comparti pronto e despues di tanto espera, cu porfin San Nicolas tambe ta haya su MFA.
“Compaña nos riba e ruta di speransa, cada bez cu mira strea den shelo, ta mira e luz cu ta guia e gobernacion aki, cu ta e luz di e bon comun, cual ta srirbi e pais”, Prome Minister Mike Eman a bisa.
