E centro di Oranjestad, cu su historia rico y su potencial vibrante, ta confrontando un crisis cu ta menasa e vision di su futuro. Inversionistanan local, cu a pone nan alma y placa den embeyece y revitalisa e area, ta na nan limite. Nan esfuersonan, cu ta tuma luga tur dia, ta wordo tranca pa e falta di atencion di e instancianan gubernamental. E situacion a yega na un punto di urgencia extremo y un grito di ayudo ta resonando door di e cayanan di ciudad: We need HELP.
Pa lunanan, negoshinan manera Aruba Experience Cafe a bati na porta di e inspeccion di ciudad (City Inspector) pa adresa un area den centro cu ta keda den un estado di neglisha y sushedad. A haci yamada na nan repetidamente, pero e peticionnan a keda sin contesta. E negligencia aki no ta solamente frustrante, pero ta un bofta den cara di esnan cu ta traha incansablemente pa drecha e ambiente di centro di ciudad.
E negligencia aki no ta un problema chikito. E ta directamente contra e esfuersonan di inversionistanan, kende nan a inverti miles di florin pa trece bida bek den e area. E ta crea un imagen negativo cu ta daña e reputacion cu nan ta purbando di construi. E ta tambe un menasa pa siguridad publico, specialmente considerando e reto di adictonan di droga den e area. Segun un post reciente di Aruba Experience Cafe, e combinacion di adictonan y e falta di mantencion ta “simply too much.”
E situacion ta bira mas critico ainda cu e evento di Ban Back Caya programa pa mañan, 8 di augustus. E evento aki, cu ta e di dos di su tipo, ta un oportunidad pa mustra e miho di centro di ciudad. Pero con por spera pa e comunidad y turistanan sinti nan orguyoso di e logronan aki ora cu un bista di negligencia y sushedad ta keda asina visibel? E evento ta resalta un contraste cruel entre e vision di un centro vibrante y e realidad di negligencia cu ta keda sin atende.
E inversionistanan ta haci nan parti y nan ta pidi pa e departamento responsabel haci di nan. Mantencion y limpiesa di un area publico ta responsabilidad di gobierno. E departamento responsabel mester drenta den accion y atende e problema. E no ta solamente e responsabilidad di e negoshinan pa mantene e areanan publico limpi, sino cu un gran parti di e responsabilidad aki ta den man di gobierno.
E yamada aki ta un grito publico pa accion. E no ta un peticion, sino un exigencia. E tempo pa warda a pasa. Pa e futuro di Oranjestad y pa e esfuerso nan di inversionistanan local por tin exito, e situacion mester wordo atendi di inmediato. Mescos cu e post a termina: “Please HELP US.” E pregunta ta: Ken lo scucha e yamada aki y duna e ayudo necesario? E comunidad di negoshi ta warda ansiosamente.
