Tin hopi hende por puntra awor aki mes, con por ta posibel cu mi oracion ta wordo stroba, y dicon e ta wordo stroba, y ta kico ta stroba mi oracion.
Bijbel ta bisa nos cuanto cos por stroba nos oracion di wordo scucha, y esey ta pa nos biba un bida serio y fiel na Dios.
Pica cu no a wordo confesa:
Den Salmo 66 :18-19-20 David ta bisa: Si mi a warda maldad den mi curason, Senjor lo no a tendemi,ma di berdad, Dios a tende , E a paga atencion na e bos di mi oracion.Bendiciona sea Dios,Kende no a rechasa mi oracion, ni a kita Su misericordia for di mi,
Ta para scirbi den 1 Juan 1:9 ; Si nos confesa nos picanan, E ta fiel y hustu pa pordona nos , nos picanan y libra nos di tur inhusticia.
Idolatria den curason.
Palabra di Dios ta sinja nos na varios ocasion den bijbel cu tur locual nos pidi den nomber di Cristo Hesus, e lo duna nos . Juan 14:13-14, awel si nos ta obedece Dios Su palabra , nos lo ricibi Su bendicion, tene bon cuenta kico Senjor ta bisa den Mateo 18:19-20 y laga nos obedece Senjor.
Pidi cu motibo robes.
Esaki ta para scirbi den e buki di Santiago of Jacobo 4:3 bisando; Boso ta pidi, y no ta ricibi, pasobra boso ta pidi pa boso gaste den boso placernan. Ora nos ta pidi algo na Senjor semper nos mester duna danki( Filipensenan 4:6) y duna testmonio di Dios Su grandesa y no halsa nos mes.
Falta di Fe; Den Marco 11;24 y Santiago 1:6 ta para scirbi con nos mester pidi cu fe sin duda.
Pesey Mi ta bisa boso, tur loke boso pidi ora boso ta haci oracion,kere cu boso ta ricibi y e lo bira di boso. Esey ta nifica cu nos fe ta habri porta pa nos, pasobra Fe ta move mannan di Dios.
Falta di pordon of hende cu no kier pordona.
Marco 11:25 ta sinja nos: Y ki ora cu boso ta para haci oracion,pordona si si boso tin algo contra un hende , pa boso Tata cu ta den cielo tambe pordona boso, boso transgreshon, ma si boso no pordona , boso Tata cu ta den cielo, tampoco lo pordona boso transgreshonnan,
No lubida di lesa den Mateo 18:35 kico ta pasa cu hende cu no ta pordona di curason, Falta di pordon ta un asunto hopi delicado y no ta algo di haci wega cune, pasobra Dios no ta haci wega.
Falta di persistencia of perservera den oracion.
Den Lucas 18:1 Hesus ta conta cu nos mester haci oracion tur ora bay, y no desmaya.
Poco tempo pa oracion.
Tin hende kier hopi cos di Dios, pero nan tin tempo pa pasa dos ora na telefon riba whatsup cu amigo of amiga pero nan no por dedica un ora den Oracion. ( Mateo 26:40).
Nan tin tempo pa tur cos menos pa oracion.
Desobedencia na e palabra di Dios.
No lubida kico Cristo Hesus a bisa cu tin hopi cu ta bisa, Senjor, Senjor y no ta obedece Senjor Su palabra y no ta haci locual Senjor ta bisa.( Mateo 7:24) ( Zacarias 7:11-13).
Negligencia di e pober
Esun cu sera su horea pa sclamacion di e pober, e tambe lo sclama ma lo no wordo contesta,( Proverbionan 21:13).
Maltrato verbal of fisico di bo esposa ( 1 Pedro 3:7).
Ta tempo pa nos hala mas serca Dios, para firme, dedica tempo den oracion, y stima nos prohimo.
Sinceramente Pastor Marcel Balootje
