Pesey un homber lo bandona,su tata, y su mama,y lo uni cu su esposa, y nan dos lo bira un carni.( Genesis 2:24).
Mas confiansa tin den un matrimonio,
Mas dushi e bida ta,
Mas forsa nan tin como pareha den tur circumstancia,
Mas resistente nan ta bira contra tur plan di e enemigo,
Y mihor testimonio por wordo duna na e yuinan y tur esnan cu ta den nan circulo di amistad.
Matrimonio ta entre un homber , un muher y Dios, pasobra ta Dios a institui matrimonio, y Dios ta esun cu a forma famia, Dios ta stima famia, pasobra Dios ta un Dios di orden.
Den e orden di Dios, Dios ta bini na prome lugar, como Cabes y Donjo di tur cos, e homber ta cabes di cas, e muher ta somete na e homber, y e yuinan ta honra nan tata y nan mama. Asina un famia ta funciona den presencia di Dios.
Tur cambio cu hende kier haci , bao di influencia di e malbado, ta trece confusion, y nos tur sa cu caminda tin confusion, division y separacion ta bati na porta.
Den e bida matrimonial, no tin cuestion di ami ta manda, pero hunto nos por resolve tur cos, pasobra nos no tin nada scondi pa otro, nos bida ta transparente, pasobra esey ta boluntad di Dios.
Palabra di Dios ta bisa den Proverbionan 18:22 ; Esun cu hanja un esposa , ta hanja algo bon.y ta ricibi fabor di Senjor.
Mescos cu den awa cara ta refleha cara, asina curason di hende ta refleha hende. ( Proverbionan 27:19).
Esun cu sconde su pica, lo no prospera,ma esun cu confesa, y laga nan lo hanja misericordia.( Proverbionan 28:13).
Esun cu cana den rectitud ( Integro) lo wordo salba, ma esun cu ta perverso den su camindanan lo cay diripiente.( Proverbionan 28:18).
Cuater Proverbio fuerte cu ta hala atencion di hende, pa nan ta transparente den tur cos, pero especialmente den e bida matrimonial mester tin transparencia, no solamente den asuntonan financiero, pasobra hopi ta esnan cu ta kere cu ta ora tin placa bida ta bay bon.
Y esey ta un gran mentira, pasobra nos ta priminti , na ora di casamento, cu nos lo ta cu otro den tempo bon y tempo malo, den rikesa y den probesa.
Si tin separacion ora cos no ta bon, of tin un trato diferente meymey di luna y otro trato fin di luna, anto e ora ey no tin transparencia, y mester revisa e asunto pa diabel no cohe bentaha.
Pesey poniendo mentira un banda, cada un di boso papia berdad cu su prohimo, pasobra nos ta miembro di otro. Rabia ma no haci pica, no laga solo baha riba boso rabia, no duna diabel oportunidad.( Efesionan 4:25-26).
E ora ey Hesus a bolbe papia cu nan bisando:Ami ta e lus di mundo, esun cu sigi Mi lo no cana den scuridad, ma lo tin e lus di bida,
Caminda tin scuridad no tin transparencia,y mayoria biaha caminda no tin transparencia, pica ta presenta y ta domina, pesey e palabra di Dios ta bisa den 1 Juan 1:9: Si nos confesa nos picanan E ta fiel y husto pa pordona nos, nos picanan y libra nos di tur inhusticia.
Santiago 5:16 ta para scirbi: Pesey confesa boso picanan un na otro,y haci oracion un pa otro, pa boso wordo cura. E oracion efectivo di un hende hustu por logra hopi.
No laga nos ganja nos mes, tur matrimonio mester di presencia di Cristo Hesus, mescos cu nos bida tin mester di rosea y awa tur dia .
Sinceramente, Pastor Marcel Balootje
