yiunan ta un herencia di Señor, e fruta di barica ta un recompensa. ( Salmo 127:3).
Ta masha bunita ora nos tende hende bisa mi yiunan tin tur cos, mi yiunan no falta nada, tur cos ami ta cumpra pa mi yiunan, mi ta traha duro pa mi yiunan. Pero awor ta bini e pregunta : Abo tin tempo pa bo yuiinan?
Un mucha cu su mayor no tin tempo pe, ta un mucha cu un bida bashi y sunu, un mucha cu no ta wordo educa, y coregi manera mester ta pasobra su mayor no tin tempo pa esey.
Hopi mayor awendia tin dos trabao, pasobra supuestamente e placa no ta yega,y hopi ta bibando for di nan forsa, pasobra nan kier competi cu otronan.
Mayor cu ta traha te laat anochi, y ta presenta 9 pm cu cuminda Fastfood den man of cuminda di chines , pasobra no tin tempo pa cushina, pa e yiu cu mester a come for di seis or di atardi.
Tin hopi mayor cu nan fisico ta mas importante cu e atencion y tempo cu nan mester dedica na nan yiunan.
Mayor cu ta sali trabao y bay Gym directamente, pasobra e curpa mester keda den forma elegante, y solamente ta manda un App pa e yui na cas pasa si e mucha tey of no, of ta haci un video call, pa asina tira un control mas extenso.
Otro caso e uña, y e cabey den kapsalon ta tuma hopi tempo cu e mayor mester dedica na su yiu, pasobra di berdad bisa, e muchanan cu tin problema, hopi biaha ta resulta cu ta pa falta di atencion di mayor.
Laga nos no papia mes di mayor, cu ta bay supermarket y e prome cos cu ta bay den garoshi ta e caha di serbes of e botter di Longneck, sin tene cuenta cuanto cuminda ta necesario pa cas, y no tin nada mas doloroso, ora tanto Mamai y Papai ta consumi alcohol, pasobra tur dos ta inverti den alcohol, y lubida riba cuminda saludable pa e yiunan.
E palabra di Dios ta bisa cu un mayor mester ta un ehempel di respet y obedencia na Dios pa su yiunan, pasobra ta riba bo como mayor e prome atencion ta wordo poni, abo ta e modelo pa bo yiunan.
Bo responsabilidad como mayor den bida di bo yiu, no por wordo haci door di maestro of maestra di scol,ni tampoco bende bo yiu cu internet, pensando cu e mucha sa tur cos, pasobra bo ta gaña bo mes, y bo ta perhudica e mucha den su educacion, poniendo asina su crecemento na peliger, ya cu e mucha ta crece cu hopi falta di norma y balor.
Nos lo no tene nada scondi pa nos yiunan, pero nos mester guia nan den e caminda di Dios, y den e displina di nos Dios, pasobra esey ta agrada Dios, pasobra e ta un mandato di Dios, pa tur mayor.
Nieto ta un corona di hende bieuw y gloria di e yiunan ta nan mayornan.( Proverbionan 17:6)
Coregi bo yiu , y e lo duna bo trankilidad,si e lo haci bo alma contento.( Proverbionan 29:17).
Stop di corre caya, y pone atencion na cas, pasobra paña y cuminda , telefon, data ,tv y computer no tin mas balor cu bo cariño , amor y respet y tempo pa bo yui.
Respeta bo yiunan, pa bo yiunan respeta ta bo, pasobra ora no tin respet na cas,e mucha lo no respeta su mes,pasobra ningun hende por duna loke nan no a ricibi.
Sinceramente, Pastor Marcel Balootje.
