Durante su bishita na Hulanda, Prome Minister di Aruba, mr. Mike Eman, a bishita Huis73, un centro cultural y educativo innovador cu recientemente a habri su portanan den un edificio historico completamente renoba den centro di Den Bosch. Durante e bishita, Prome Minister Eman a ricibi un recorido extenso di parti di director Nan van Schendel y lider di e proyecto Peter Zwart, kende a splica ampliamente e vision y e proceso di desaroyo tras di e centro comunitario moderno. Huis73 ta combina biblioteca, espacionan cultural pa hacu estudio creativo, les di musica, espacio pa varios activida artistico y area di encuentro social den un solo edificio di mas cu 8.000 meter cuadra. E centro ta habri diariamente for di mainta te anochi y ta enfoca riba acceso pa tur grupo den comunidad.
Prome Minister Mike Eman a indica cu e bishita tabata particularmente inspirador pa Aruba, mirando cu Gobierno ta actualmente trabando riba diferente proyecto di MFA (Multi Functionele Accommodatie) riba isla. “E concepto aki ta mustra hopi similar cu con nos ta desaroyando e MFAnan na Aruba. Den un solo edificio bo tin diferente servicio pa comunidad. Aki bo ta mira un biblioteca grandi cu area pa mucha y adulto, salanan di estudio amplio y hopi espacionan creativo,” Prome Minister Mike Eman a expresa durante e bishita. Segun e Prome Minister, Aruba ta buscando inspiracion internacional pa fortalece nos espacionan comunitario cu por combina educacion, creatividad, innovacion y encuentro social den un forma moderno y accesibel pa un y tur. “Nos ta buscando inspiracion pa con nos por sigui desaroya nos MFA na San Nicolas. Den mes momento, nos ta evaluando tambe kico exactamente t’e deseo di e comunidad y con nos por incorpora esey den e proyecto,” el a comenta.
Durante e recorido, atencion special a bay p’e manera con Huis73 a logra integra tanto actividad tradicional como innovacion digital. E edificio tin un studio pa graba musica, espacio pa les di musica y baile, area creativo y tambe facilidad tecnologico moderno unda hobennan por desaroya habilidad digital. Prome Minister Mike Eman a enfatisa cu Aruba tambe tin necesidad di mas espacio comunitario unda creatividad y desaroyo personal por florece. “Hopi biaha nos tende na Aruba cu comunidadnan ta sinti falta di espacio pa desaroyo social y creativo,” e Prome Minister a declara. “Esaki ta sirbi como inspiracion importante pa Aruba mientras nos ta sigui pensa riba e MFAnan cu nos kier desaroya pa diferente bario riba nos isla.”
Prome Minister Mike Eman a expresa su gratitud pa e caluroso recibimento y pa e oportunidad pa mira di cerca con inversion den cultura, conocemento y comunidad por contribui na desaroyo social sostenibel. “Nos kier crea espacionan unda comunidad por reuni, lesa, crea y desaroya hunto. Esey ta fundamental pa construccion di un comunidadnan fuerte y resiliente,” el a conclui.
