Minister di Deporte, Minister Gerlien Croes ta expresa su gran orguyo cu Aruba ta pais anfitrion di e prestigioso Concacaf Under-15 Boys’ Championship, cu lo tuma luga di 4 pa 10 di augustus venidero.
E campeonato ta uni region pa cu futbol hubenil, unda 16 pais, dividi den 4 grupo di 4, lo competi na un nivel halto di competencia hubenil di futbol. Aruba ta forma parti di un grupo desafiante y lo enfrenta Jamaica, Corsou y Belize.
Manera Minister Gerlien Croes ta destaca “e evento aki ta representa hopi mas cu solamente un torneo di futbol. Esaki ta un plataforma pa nos hobennan sobresali, pa por desaroya y pa demostra cu Aruba tin talento, pasion y potencial riba nivel internacional. E torneo aki ta un paso importante pa motiva y fortalece nos infrastructura deportivo y pa crea mas oportunidad pa nos hobennan”.
E ekipo nacional di Aruba ta wordo lidera pa coach Dreyer Bracho, apoya pa un team tecnico dedica y profesional pa guia nos hobennan durante e campeonato. E torneo ta un plataforma pa e hobennan crece, briya y representa nos bandera cu orguyo.
Minister Croes ta expresa su gratitud pa e esfuerso di, CONCAFAF AVB y tur colaborador, y ta pone enfasis riba importancia di sosten y formacion pa nos talentonan.
Ban hunto apoya nos seleccion nacional U-15 durante cada wega. Deseando nan tur clase di exito, pasion y determinacion. Aruba ta cu boso!
