E mensahe di Papa Leon XIV durante su bishita na Argentina, cu economia mester ta na servicio di hende y no pa robes, ta refleha un principio central den e vision economico y social cu Prome Minister Mike Eman ta defendiendo na Aruba: crecemento economico mester traduci den un miho calidad di bida pa pueblo, specialmente pa trahadonan, pensionadonan y esnan mas vulnerabel den sociedad.
Diadomingo 8 di november 2026, durante un discurso na Buenos Aires den presencia di Presidente di Argentina Javier Milei, Papa Leon XIV a haci un yamada pa pone dignidad humano y bienestar di pueblo den centro di tur decision economico. “E economia mester ta na servicio di hende, y no hende na servicio di economia”, Papa a declara, destacando cu progreso economico mester beneficia henter sociedad y no solamente un parti di e poblacion. E lider di Iglesia Catolico a pone enfasis special riban e famianan cu ta enfrenta incertidumbre financiero, e personanan cu ta buscando trabou, nos grandinanan cu durante hopi aña a contribui na desaroyo di sociedad y esnan cu, a pesar di traha duro, no ta logra cubri nan necesidadnan basico di nan hogar.
Papa Leon XIV a subraya tambe cu dignidad humano no ta depende di e situacion economico of capacidad fisico di un persona. Esnan cu ta enfrenta malesa, cu tin limitacion of cu ta depende di cuido di otro, merece atencion, acompañamento y proteccion. Segun Papa, un sociedad mester crea oportunidad, stimula iniciativa den sector priva y percura cu e beneficio di crecemento economico yega tambe na esnan cu ta enfrenta mas dificultad.
Prome Minister Mike Eman ta defendiendo e mesun principio na Aruba
E mensahe di Papa ta conecta cu e debate economico y social cu durante ultimo tempo ta dominando e discucion na Aruba. Prome Minister Mike Eman a pone como un di su prioridadnan e necesidad pa acerca salario minimo na e nivel di bestaansminimum, e suma necesario pa un persona por cubri su necesidadnan basico y biba cu dignidad. Segun e vision cu Eman ta defendiendo, Aruba a conoce un crecemento economico significativo, particularmente den turismo, pero e prosperidad aki no ta reflehando suficientemente den poder di compra di tur trahador y nan famianan. E Prome Minister ta sostene cu progreso economico no por wordo midi solamente den cifranan di turismo, entrada di gobierno of crecemento di GDP. E progreso ey mester wordo sinti tambe den cas di pueblo, den capacidad di un famia pa cubri su gastonan y den e siguridad financiero di nos grandinanan.
E propuesta di Eman ta contempla un aumento gradual di salario minimo durante tres aña, cu e meta pa acerca esaki na bestaansminimum. E lucha aki no a cuminsa recientemente. Gobierno AVP-FUTURO a encarga estudionan economico y a busca dialogo cu gremionan comercial y representantenan di trahadonan. A pesar cu ainda no a logra un acuerdo completo entre tur sector, Eman a mantene e necesidad pa sigui busca un solucion pa e distancia entre salario minimo y costo di bida.
EBA ta identifica espacio pa aumento gradual di salario minimo
E rapport Koopkrachtplan Aruba, prepara pa Economisch Bureau Amsterdam (EBA) pa economistnan Koert van Buiren y Martijn Mak, ta forma un parti importante di e fundamentacion economico di e propuesta. E investigacion ta indica cu salario minimo, incluyendo e reparatietoeslag corespondiente, ta cubri aproximadamente 80% di e entrada necesario pa un persona cu ta biba su so cubri su necesidadnan basico.
EBA ta recomenda pa aumenta salario minimo gradualmente te acerca esaki na e nivel di bestaansminimum. Segun Van Buiren, e circunstancianan economico di Aruba ta ofrece espacio pa un aumento modera di salario minimo, cu e expectativa di un impacto limita riba inflacion. Na mes momento, e rapport ta reconoce cu aumento di salario por trece gastonan adicional pa empresanan. P’esey, EBA ta recomenda consulta cu dunadonan di trabou, investigacion adicional y posible compensacion pa empresanan cu ta emplea hopi trahador cu salario minimo.
E posicion di SER, den su conseho di januari 2026, ta pone enfasis riba e necesidad pa un preparacion cuido. SER ta reconoce importancia social di un salario cu ta cubri necesidadnan basico, pero ta expresa preocupacion tocante e calendario di implementacion, e base di e calculacionnan y e posibel impacto riba empleo, prijsnan y empresanan.
SER a cuestiona tambe si e prome fase por wordo introduci di un manera responsabel durante 2027, sin suficiente preparacion y medidanan complementario.
Lider politico Hulandes ta destaca importancia di salario husto y bienestar social
E vision di Prome Minister Mike Eman pa conecta crecemento economico cu bienestar di pueblo a ricibi reaccion positivo di diferente lider politico Hulandes durante su bishita na Den Haag luna pasa.
Henri Bontenbal, lider di fraccion di CDA den Tweede Kamer, a destaca e esfuersonan di Eman pa aumenta salario minimo. Segun Bontenbal, prosperidad economico no mester keda limita na cifra positivo, sino mester traduci den bienestar social y siguridad di existencia pa e ciudadanonan. E vision aki ta conecta cu e principio di bon comun, cu ta forma parti di e pensamento comparti entre CDA y AVP.
Di su banda, Ruben Brekelmans, lider di fraccion di VVD, a considera e discusion tocante bestaansminimum y salario minimo na Aruba como un asunto importante. “Cu e asunto aki tin un luga asina prominente riba agenda di Aruba, mi ta considera esaki hopi sensato”, Brekelmans a declara. E lider di VVD a enfatisa importancia di percura cu e beneficio economico di turismo yega na henter pueblo y cu ningun hende keda atras.
Lider di fraccion di Progressief Nederland (PRO), Jesse Klaver, tambe a expresa su aprecio pa e propuesta di Eman pa conecta salario minimo cu bestaansminimum. “No ta aceptabel cu nan ta traha duro y cu nan salario no ta suficiente pa nan por biba”, Klaver a enfatisa. Segun e lider di PRO, politica mester ta enfoca riba bienestar di hende y e oportunidad pa famianan construi un miho futuro. Parlamentario Mikal Tseggai di PRO tambe a expresa sosten pa e iniciativa. “Na PRO nos ta considera esaki un idea hopi bon. Tambe na Hulanda Europeo, Progressief Nederland ta traha pa un bida pagabel pa tur hende. Naturalmente, esaki mester conta den henter nos Reino”, Tseggai a declara.
Na Eerste Kamer, Paul Rosenmöller, presidente di Commissie voor Koninkrijksrelaties (KOREL), a expresa su aprecio pa e plan di Gobierno di Aruba pa aumenta salario minimo gradualmente. Rosenmöller a considera e iniciativa un paso importante pa reduci pobresa y disminui e diferencianan social. El a destaca cu, a pesar di e prosperidad cu turismo ta genera, ainda tin hendenan na Aruba cu no ta beneficia suficientemente di e crecemento economico.
Prome Minister Hulandes Rob Jetten tambe a reconoce cu costo di energia, cuminda y vivienda ta halto na Aruba y otro paisnan Caribense den Reino. Jetten a destaca importancia di inversionnan economico pa fortalece bienestar social.
E diferente declaracionnan ta mustra cu e relacion entre prosperidad economico y bienestar social ta un tema cu ta ricibi atencion tambe den politica Hulandes, aunke e lidernan no tur a expresa e mesun posicion tocante e propuesta specifico na Aruba.
Gobierno a tuma diferente paso pa trece alivio pa pensionado y esnan vulnerabel
E principio cu economia mester ta na servicio di hende ta refleha tambe den diferente alivio social cu Gobierno AVP-FUTURO a implementa of anuncia desde su entrada na mando. Un di e prome pasonan tabata e aumento di Afl. 250 pa luna den reparatietoeslag pa e pensionadonan di AOV y AWW, entrante mei 2025. E alivio aki a beneficia mas cu 21.000 pensionado, incluyendo nos grandinanan cu ta depende di nan pension pa cubri nan gastonan diario.
Entrante januari 2026, Gobierno a introduci tambe un reduccion di prima di AZV pa pensionadonan di 65 aña of mas, di 5% pa 0% riba e prome Afl. 30.000 di entrada anual cu ta cay bou di e regulacion. Ademas, Gobierno a anuncia un aumento di basisbijstand di Afl. 450 pa Afl. 600 pa luna, aumento di asistencia escolar pa famianan cu yiu, como tambe fortalecemento di sosten pa personanan cu limitacion y otro gruponan vulnerabel. E alivionan aki ta forma parti di e esfuersonan pa combate pobresa, fortalece poder di compra y percura cu e crecemento economico cu Aruba ta experimenta beneficia tambe esnan cu mas tin mester di sosten.
Parlamento a aproba mocion conjunto di AVP y FUTURO pa aumenta salario minimo
E debate tocante salario minimo a conoce un desaroyo importante durante e reunion parlamentario cu a culmina den madrugada di 7 di november 2026. Parlamento di Aruba a aproba un mocion presenta den conhunto pa fraccionnan di AVP y FUTURO, cu ta solicita Gobierno pa aumenta salario minimo mensual cu Afl. 200, pa mas tarda 1 di maart 2027. E mocion ta contempla tambe un sistema di compensacion pa e empresanan, cu e intencion di limita e impacto di aumento di e gastonan di personal y evita cu e gastonan adicional wordo pasa directamente pa consumidor mediante aumento di prijsnan. Ademas, e mocion ta pidi pa sigui cu consulta entre Gobierno, gremionan comercial y representantenan di trahadornan, mientras ta prepara e legislacion necesario pa implementa e aumento.
Crecemento economico mester yega den cas di pueblo
E debate na Aruba ta pone un pregunta fundamental riba mesa: con por percura cu e exito di turismo y economia ta beneficia tambe e trahado cu tur dia ta contribui na e prosperidad ey? E preocupacionnan di sector comercial tocante costo di operacion, empleo y e prijsnan ta forma parti di e debate y ta exigi un implementacion responsabel. Na mes momento, e realidad di famianan cu ta traha henter siman sin por cubri nan necesidadnan basico ta un problema social cu mester haya atencion.
E mensahe di Papa Leon XIV na Argentina ta pone e principio di dignidad humano den centro di e discusion. No ta trata di un posicion specifico tocante politica di Aruba, sino di un vision mas amplio cu ta destaca cu economia ta existi pa beneficia hende. E vision aki ta conecta cu e meta cu Prome Minister Mike Eman ta defendiendo: transforma prosperidad economico den bienestar social, fortalece poder di compra y percura cu nos grandinanan, trahadonan y famianan mas vulnerabel no keda atras.
Pasobra e berdadero progreso di un pais no ta wordo midi solamente den cuanto su economia ta crece, sino tambe den con e crecemento ey ta mehora e bida di su pueblo.
